सरकारी जग्गा व्यक्तिको नाममा दर्ता गरेर भ्रष्टाचार भएको भन्दै पूर्वमन्त्रीसहित १७५ जनाविरुद्ध मुद्दा दायर
एसीपी संवाददाता
२३ माघ २०७६, बिहीबार ०६:३५ मा प्रकाशित
माघ २३ गते एजेन्सी । अख्तियार दुरुपयोग अनुसन्धान आयोगले सरकारी जग्गा व्यक्तिको नाममा दर्ता गरेर भ्रष्टाचार गरेको अभियोगमा पूर्वमन्त्रीसहित १७५ जनाविरुद्ध विशेष अदालतमा बुधवार मुद्दा दायर गरेको छ।
आयोगले तत्कालीन उपप्रधानमन्त्री विजयकुमार गच्छदारसहित १७५ विरुद्ध विशेष अदालतमा आरोपपत्र दायर गरेको हो। आयोगले बालुवाटारस्थित ललिता निवास क्याम्पभित्रका सरकारी, सार्वजनिक जग्गा हिनामिना गरेको आरोपमा तीन मन्त्री, छ विशिष्ट श्रेणीका पदाधिकारी, कर्मचारीलगायत १७५ विरुद्ध आरोपपत्र दायर गरेको आयोगका प्रवक्ता प्रदीपकुमार कोइरालाले जानकारी दिए।
आयोगले तत्कालीन भूमिसुधार तथा व्यवस्थामन्त्री डम्बर श्रेष्ठ, चन्द्रदेव जोशी, तत्कालीन भूमिसुधार तथा व्यवस्था मन्त्रालयका सचिव छविराज पन्त, दीप बस्न्यात, दिनेशहरि अधिकारी, भाटभटेनीका सञ्चालक मीनबहादुर गुरुङ, मुख्य मतियार मानिएका शोभाकान्त ढकाल लगातय विरुद्ध मुद्दा दायर गरेको हो।
यस्तै सरकारी जग्गा व्यक्तिका नाममा दर्ता गराउन प्रमुख भूमिका खेलेका भनिएका शोभाकान्त ढकालले ३९ करोड रुपैयाँ र राम सुवेदीले ५२ करोड रुपैयाँ बराबरको भ्रष्टाचार गरेको आयोगको आरोपपत्रमा उल्लेख छ।
आयोगका अनुसार भाटभटेनी सुपरमार्केटका सञ्चालक मीनबहादुर गुरूङले पनि ढकालले जति नै ३९ करोड २७ लाख ६८ हजार रुपैयाँ भ्रष्टाचार गरेको अभीयोग छ। त्यस्तै पूर्वमन्त्री गच्छदार, छविराज पन्त, डम्बर श्रेष्ठ, अख्तियारका पूर्वप्रमुख दीप बस्न्यात र जिल्ला न्यायाधीश विनोद गौतमले नौ करोड ६५ लाख ७६ हजार रुपैयाँ भ्रष्टाचार गरेको अभियोगपत्रमा उल्लेख छ। न्यायाधीश गौतम उपसचिव हुँदा बालुवाटार जग्गा व्यक्तिको नाममा दर्ता गराउन सहयोग गरेको पाइएको छ। त्यस्तै पूर्वमन्त्री चन्द्रदेव जोशी र पूर्वसचिव दिनेशहरि अधिकारीले सात करोड आठ लाख ४८ हजार रुपैयाँ भ्रष्टाचार गरेको आरोपपत्रमा उल्लेख छ।
आयोगले बिगोबमोजिम जरिवाना र आठदेखि १० वर्षसम्म कैद सजाय माग गरेको छ। त्यस्तै, तत्कालीन उपसचिव हुपेन्द्रमणि केसीले ३० करोड ३९ लाख ९६ हजार रुपैयाँ, मालपोत कार्यालय डिल्लीबजारका तत्कालीन मालपोत अधिकृत हरिकृष्ण तिमल्सिनाले ३२ करोड १९ लाख २० हजार रुपैयाँ, सोही कार्यालयका मालपोत अधिकृत पर्शुराम पोखरेलले ३२ करोड १९ लाख २० हजार रुपैयाँ, मालपोत कार्यालय डिल्ली बजारका प्रमुख मालपोत अधिकृत प्रेमबहादुर खापुङले नौ करोड ६५ लाख ७६ हजार रुपैयाँ भ्रस्टाचार गरेको अभियोगमा मुद्दा दर्ता गरिएको छ । त्यसैगरी, भूमिसुधार तथा व्यवस्था मन्त्रालयका सहसचिव जीतबहादुर थापाले नौ करोड ६५ लाख ७६ हजार रुपैयाँ, शहरी विकास तथा भवन निर्माण विभागका महानिर्देशक अशोकनाथ उप्रेतीले नौ करोड ६५ लाख ७६ हजार रुपैयाँ बराबरको भ्रष्टाचार गरेको अभियोगपत्रमा उल्लेख छ।
गुठी संस्थान केन्द्रीय कार्यालय त्रिपुरेश्वरका मुख्य अधिकृत हरिबोल आचार्यले सात करोड आठ लाख ७८ हजार रुपैयाँ, भूमिसुधार तथा व्यवस्थापन विभागका तत्कालीन महानिर्देशक रुद्रकुमार श्रेष्ठले १३ करोड २३ लाख ७२ हजार रुपैयाँ, भूमिसुधार तथा व्यवस्थापन विभागका तत्कालीन निर्देशक पुष्पराज उपाध्यायले १३ करोड २३ लाख ७२ हजार रुपैयाँ बराबरको भ्रष्टाचार गरेको अभियोगपत्रमा उल्लेख छ।
सम्बन्धित खबर
ताइवानसँगको व्यापार नगर्न बेलायतलाई चीनको दादागिरी
४ घण्टा अगाडि