स्थानीय चुनावको सरगर्मी : ‘पार्टी कसैको पेवा होइन’ भन्दै जनताको माझमा पुग्दै नेताहरू जनताको आवश्यकता र चाहनाका आधारमा स्थानीय जनप्रतिनिधि छनोट गर्न अभियान सञ्चालन गर्ने तयारी
एसीपी संवाददाता
१५ आश्विन २०८३, बिहीबार २१:२१ मा प्रकाशित
दिनेश ठाकुर, नेपालगञ्ज, असोज १५ — स्थानीय तहको निर्वाचन नजिकिँदै जाँदा राजनीतिक दल तथा नेताहरूले चुनावी गतिविधिलाई तीव्रता दिन थालेका छन्। निर्वाचनलाई लक्षित गर्दै विभिन्न दलका नेता तथा सम्भावित उम्मेदवारहरू संगठन विस्तार, जनसम्पर्क तथा चुनावी रणनीति निर्माणमा सक्रिय हुन थालेका हुन्।
यसैक्रममा ‘जनताले चाहेको स्थानीय जनप्रतिनिधि जनताबाटै थाहा पाउने’ उद्देश्यसहित विशेष अभियान सञ्चालन गर्ने तयारी गरिएको छ। स्थानीय राजनीति नागरिककेन्द्रित हुनुपर्ने तथा जनप्रतिनिधि छनोटको अधिकार जनतामै निहित हुनुपर्ने धारणा अभियानमार्फत अघि सारिएको छ।
अभियानका क्रममा ‘पार्टी कसैको निजी पेवा होइन’ भन्ने सन्देशलाई समेत प्राथमिकताका साथ उठाइएको छ। राजनीतिक दलभित्र बढ्दै गएको गुटगत प्रवृत्ति, एकाधिकार र व्यक्तिगत स्वार्थप्रति प्रश्न उठाउँदै अभियानका अगुवाहरूले कुनै पनि राजनीतिक पार्टी व्यक्ति वा समूहको निजी सम्पत्ति हुन नसक्ने बताएका छन्।
पार्टी आम नागरिक तथा कार्यकर्ताको साझा संस्था भएकाले पार्टीभित्र सबै सदस्यको समान अधिकार, सहभागिता र सम्मान सुनिश्चित हुनुपर्ने उनीहरूको धारणा छ। नेतृत्व चयनदेखि उम्मेदवार छनोटसम्मका प्रक्रियामा जनभावना र कार्यकर्ताको सहभागितालाई प्राथमिकता दिनुपर्नेमा समेत जोड दिइएको छ।
त्यसैगरी, ‘न गुट, न उपगुट—निरंकुशताविरुद्ध एकजुट’ भन्ने नारासहित पार्टीभित्र देखिएका गुटबन्दी, विवाद, विकृति र एकाधिकारविरुद्ध एकताबद्ध भएर अघि बढ्न आह्वान गरिएको छ।
अभियानमार्फत स्थानीय तहमा नागरिकका वास्तविक आवश्यकता, अपेक्षा र प्राथमिकता बुझ्ने तथा त्यसका आधारमा जनप्रतिनिधि छनोटका लागि वातावरण निर्माण गर्ने लक्ष्य राखिएको बताइएको छ।
स्थानीय तहको निर्वाचनको मिति नजिकिँदै जाँदा यस्ता अभियानले राजनीतिक दलभित्रको आन्तरिक लोकतन्त्र, जनसहभागिता तथा उम्मेदवार छनोटको विषयमा बहसलाई थप व्यापक बनाउने देखिएको छ। साथै, स्थानीय तहको नेतृत्व चयनमा नागरिकको प्रत्यक्ष सहभागिता र जनचाहनाको विषय आगामी चुनावी गतिविधिको महत्वपूर्ण एजेन्डा बन्न सक्ने देखिन्छ।
सम्बन्धित खबर
