नेपालगञ्ज-दिल्ली उडान सम्भाव्यता खोज्दै समिति
एसीपी संवाददाता
१३ पुष २०७९, बुधबार ०८:२२ मा प्रकाशित
काठमाडौँ : भारतीय शहरका पर्यटकलाई नेपालगञ्जमार्फत नेपालका विभिन्न पर्यटकीय गन्तव्यमा ल्याउनका लागि बाँकेको नेपालगञ्जमा एक समिति गठन भएको छ । नाट्टा बाँके च्याप्टरको पहलमा मंगलबार कोल्टे भान्छाघरमा बसेको भेलाले नेपालगञ्ज उपमहानगरको संयोजकत्वमा नेपालगञ्ज–दिल्ली उडान सम्भाव्यता अध्ययन समिति गठन गरेको हो ।
समितिले भारतका दिल्ली, चण्डीगढ र देहरादुन शहरमा उडान भर्नका लागि आवश्यक पहल, सम्भाव्यता अध्ययन, नेपाल तथा भारतीय सरोकारवालाको ध्यानाकर्षण गर्नेदेखि सम्भावित पर्यटकीय फाइदाका विषयमा बृह्त छलफल गर्ने समितिका सहसंयोजक नाट्टा बाँके च्याप्टरका अध्यक्ष श्रीराम सिग्देलले जानकारी दिए ।
उनका अनुसार समितिको संयोजकत्व नेपालगञ्ज उमहानगरका मेयर अथवा उपमेयरले गर्नेछन् । समितिको सहसंयोजकमा नाट्टा बाँके च्याप्टरका अध्यक्ष सिग्देल छन् । यस्तै हान बाँके, पर्यटन प्रवद्र्धन मञ्च, होटल व्यवसायी संघ बाँके, नेपालगञ्ज उद्योग वाणिज्य संघ, च्याम्बर अफ कमर्श लगायत संस्थाबाट पदेन सदस्य रहनेछन् ।
उल्लेखित संस्थाले केही दिनमै सदस्यहरुको टुंगो लगाउने पनि नाट्टा बाँके च्याप्टरका अध्यक्ष सिग्देलले बताए । समितिले रारा, कैलाश मानसरोवसर, खप्तड लगायतका पर्यटकीय क्षेत्रमा आउन चाहने पर्यटकका लागि सिधा हवाई रुट उपलब्ध हुने गरि नेपालगञ्ज–दिल्ली उडानको सम्भाव्यता अध्ययन गर्नेछ ।
अहिले मानसरोवर र पश्चिमका पर्यटकीय गन्तव्य पुग्न दिल्लीबाट काठमाडौँ आएपछि मात्रै पश्चिम नेपालको उडान भर्नुपर्ने बाध्यता छ । जसकारण पश्चिम नेपालका पर्यटकीय गन्तव्यसमेत ओझेलमा परिरहेका छन् । समितिको सदस्यमा नेपालगञ्जका पत्रकार झलक गैरे र पर्यटन उद्यमी ओम मिश्र छन् । बाँकेबाट प्रतिनिधित्व गर्ने प्रदेश र संघीय सांसद समितिको सल्लाहकारमा राखिएको छ ।
नेपालगञ्जमा छिट्टै औपचारिक बृह्त भेला बोलाएर समितिलाई मूर्त रुप दिइने पनि सहसंयोजक सिग्देलले जानकारी दिएका छन् । पछिल्लो समय बुद्ध एयरले बनारस–पोखरा उडान भर्ने तयारी गरिरहेको छ । बुद्धले नेपाल र भारतका अरु शहरमा पनि सिधा हवाई उडानको प्रयास गरिरहेको छ । यसै सन्दर्भमा नेपालगञ्जका पर्यटन व्यवसायी पनि नेपालगञ्ज–दिल्ली उडानको सम्भाव्यता खोज्न तम्सिएका हुन् ।
यसअघि नाट्टा बाँके च्याप्टरको विशेष पहल तथा अग्रसरताले नेपालगञ्ज–पोखरा उडान सञ्चालन भएको थियो ।
सम्बन्धित खबर
एक साथ दुई मोर्चामा सहयोग गर्दै भारत सरकार
१५ घण्टा अगाडि
