मोदीको नेपाल भ्रमणले पायो तीव्रता, यस्तो छ भ्रमण कार्यतालिका
एसीपी संवाददाता
२७ बैशाख २०७९, मंगलवार १०:२३ मा प्रकाशित
काठमाडौं। भारतीय प्रधानमन्त्री नरेन्द्र मोदीले बुद्ध पूर्णिमाका अवसरमा गौतम बुद्धको जन्मस्थल नेपालको लुम्बिनी भ्रमण गर्ने कार्यक्रमले तीव्रता पाएको छ। गौतम बुद्धको २५६६ औँ जन्मजयन्तीको अवसर पारेर युनेस्कोको निमन्त्रणामा मोदी मे १६ मा लुम्बिनी भ्रमणमा आउने भएका हुन्।
विश्वभरका बौद्ध धर्मावलम्बीहरूका लागि सबैभन्दा पवित्र स्थाल लुम्बिनीलाई युनेस्कोले सन् १९९७ मा विश्व सम्पदा सुचिमा समावेश गरेको थियो।
अहिले लुम्बिनी क्षेत्रमा चारवटा हेलिप्याडको निर्माणा भइरहेको छ। मोदी कुशीनगरबाट हेलिकोप्टरमा लुम्बिनी अवतरण गर्ने भएका छन्।
मे १६ मै गौतमबुद्ध अन्तर्राष्ट्रिय विमानस्थलको उद्घाटनसमेत गर्नका लागि प्रधानमन्त्री शेरबहादुर देउवाले पनि लुम्बिनीको भ्रमण गर्ने कार्यक्रम रहेको छ। देशको दोस्रो अन्तर्राष्ट्रिय विमानस्थलको उद्घाटन गरेपछि देउवाले मोदीलाई स्वागत गर्नेछन्।
दुवै नेताले मायादेवी मन्दिरमा पूजाअर्चना गर्ने छन् र त्यसपछि भारत सरकारको आर्थिक सहयोगमा बन्ने बौद्ध विहारको शिलान्यास गर्ने कार्यक्रम रहेको छ।
संस्कृति तथा पर्यटन मन्त्रालयको मातहतमा रहेको अन्तर्राष्ट्रिय बौद्ध महासंघमार्फत भारत सरकारले गुम्बा निर्माणका लागि एक अर्ब रुपैयाँभन्दा बढी खर्च गरिरहेको छ। मोदीले अशोक स्तम्भ र बोधिवृक्षको पनि भ्रमण गर्नेछन् । बोधिवृक्षकै रूखमुनि गौतम बुद्धले बुद्धत्व प्राप्त गरेका थिए।
विश्वभरका बौद्ध धर्मावलम्बीहरुको सहभागिता रहने कार्यक्रममा देउवा र मोदीले वार्ता र सम्बोधन गर्ने कार्यक्रम समेत रहेको छ।
लुम्बिनीमा पाँच घण्टा लामो व्यस्तता पूरा गरी मोदी कुशीनगर हुँदै नयाँ दिल्ली फर्कनेछन् । सन् २०१४ को अगस्तमा पहिलो पटक प्रधानमन्त्रीमा निर्वाचित भएपछि मोदीले नेपाल आएर लुम्बिनी, जनकपुर र मुक्तिनाथको भ्रमण गर्ने घोषणा गरेका थिए।
उनले हिन्दू तीर्थस्थल मुक्तिनाथ र जनकपुरको भ्रमण गरे पनि लुम्बिनी भ्रमणको योजना बाँकी रहेको थियो।
सन् २०१४ मा प्रधानमन्त्री भएयता मोदीको यो पाँचौं नेपाल भ्रमण हो र सन् २०१९ मा पुनः निर्वाचित भएपछिको यो पहिलो भ्रमण हो।
गत अप्रिलमा प्रधानमन्त्री शेरबहादुर देउवाले भारत भ्रमण गरी मोदीसँग भेट्नुका साथै केही सम्झौता र सम्झौतामा हस्ताक्षर गरेका थिए।
सम्बन्धित खबर
