नेपालगन्जको नेतृत्वमा ‘बुलडोजर बाबा’ ल्याउन युवाहरूको चाहना, छलफल तीव्र युवाहरूको जोड : आश्वासन होइन, काम गरेर देखाउने नेतृत्व चाहिन्छ ।
एसीपी संवाददाता
७ कार्तिक २०८३, शुक्रबार २०:१३ मा प्रकाशित
दिनेश ठाकुर, नेपालगन्ज,।
बाँकेको नेपालगन्जमा स्थानीय विकास र राजनीतिक परिवर्तनको विषयलाई लिएर नवपुस्ता (जेन–जी) युवाहरूबीच छलफल तीव्र बनेको छ। नगरको विकास र समृद्धिका लागि चर्चित युवा नेता इरफान अहमद शेष (बुलडोजर बाबा) लाई नेतृत्वमा ल्याउनुपर्ने चाहना युवाहरूले व्यक्त गरेका छन्।
विभिन्न सामाजिक तथा राजनीतिक गतिविधिका बीच युवाहरूको एक समूहले नेता शेषको सम्पर्क कार्यालयमा पुगेर नेपालगन्जको वर्तमान अवस्था, विकासका चुनौती र भावी कार्यदिशाबारे विस्तृत छलफल गरेको हो। छलफलका क्रममा युवाहरूले नगरको समग्र विकासका लागि जुझारु, जनताप्रति उत्तरदायी र काम गरेर देखाउन सक्ने नेतृत्व आवश्यक रहेको धारणा राखेका थिए।युवाहरूले नेता शेषको कार्यशैलीप्रति समर्थन जनाउँदै नेपालगन्जको विकास, सुशासन र सकारात्मक परिवर्तनका लागि सहकार्य गर्न इच्छुक रहेको बताएका छन्। उनीहरूले नगरवासीका समस्या समाधान गर्न जनताको भावना बुझ्ने र परिणाममुखी काम गर्न सक्ने नेतृत्व अहिलेको आवश्यकता भएकोमा जोड दिएका छन्।बडादसैँको अवसरमा समेत नेता शेषले आफ्नो राजनीतिक तथा सामाजिक सक्रियतालाई निरन्तरता दिएका छन्। जनअपेक्षा बुझ्ने, नगरवासीका समस्या सुन्ने तथा विभिन्न क्षेत्रका व्यक्तिसँग प्रत्यक्ष संवाद गर्ने उद्देश्यले उनले भेटघाट, छलफल र अन्तरक्रियालाई अघि बढाइरहेको बताइएको छ।पार्टीका वरिष्ठ नेता बीरबल बरईका अनुसार पछिल्लो समय नेपालगन्जका युवाहरूमा राजनीतिक चेतना र नेतृत्वप्रतिको चासो बढ्दै गएको छ। युवाहरू पुराना आश्वासनमा मात्र सीमित नभई विकासका क्षेत्रमा ठोस परिणाम दिन सक्ने नेतृत्वको खोजीमा रहेको उनले बताए।बरईका अनुसार यही क्रममा युवाहरूले स्वतःस्फूर्त रूपमा नेता शेषसँग भेटघाट गरी नगरको समृद्धि र विकासका विषयमा छलफल गरेका हुन्। छलफलमा सहभागी युवाहरूले नेपालगन्जलाई व्यवस्थित, समुन्नत र सम्भावनायुक्त सहर बनाउन सकारात्मक पहलमा साथ दिने प्रतिबद्धतासमेत जनाएको स्रोतले उल्लेख गरेको छ।
नेपालगन्जको भावी नेतृत्व र विकासको दिशाबारे युवाहरूबीच बढ्दै गएको यो छलफलले आगामी दिनमा स्थानीय राजनीतिक गतिविधिलाई थप चासोपूर्ण बनाउने देखिएको छ।यद्यपि, नेता शेषलाई नेतृत्वमा ल्याउने विषयमा औपचारिक निर्णय वा उम्मेदवारी घोषणा भने यस विवरणमा उल्लेख छैन।
सम्बन्धित खबर
