बालेन अनुशासित, जिज्ञासु र शैक्षिक रूपमा समर्पित विद्यार्थी थिए
तारा रेग्मी
२७ फाल्गुन २०८२, बुधबार ०६:१८ मा प्रकाशित<
काठमाडौँ – राष्ट्रिय स्वतन्त्र पार्टी (रास्वपा) का वरिष्ठ नेता बालेन शाह अहिले नेपाली राजनीतिक परिदृश्यमा केन्द्रबिन्दुमा छन्। झापा–५ बाट संसदीय निर्वाचनमा विजयी बनेका शाहले आफ्ना प्रतिद्वन्द्वी पूर्व प्रधानमन्त्री केपी शर्मा ओली लाई हराउँदै आगामी प्रधानमन्त्रीको सम्भावना थप बलियो पारेका छन्।
तर, धेरैले नजान्ने कुरा के हो भने शाहले आफ्नो शैक्षिक जीवन भारतको बेंगलुरुको निट्टे मीनाक्षी इन्स्टिच्युट अफ टेक्नोलोजी (NM Institute of Technology) मा बिताएका थिए। त्यहाँ उनले स्ट्रक्चरल इन्जिनियरिङमा एम टेक गरेका थिए।
शाहका पूर्वप्राध्यापकहरूले उनको विद्यार्थी जीवनलाई अनुशासित, जिज्ञासु र शैक्षिक रूपमा समर्पित भएको स्मरण गरेका छन्। सिभिल इन्जिनियरिङ विभागका प्राध्यापक श्रेयस एभी भन्छन्, “उनी शान्त स्वभावका थिए। र्यापरको रूपमा उनको प्रतिभा भए पनि क्याम्पसमा त्यसको प्रदर्शन विरलै हुन्थ्यो। उनी शैक्षिक रूपमा इमानदार र अनुशासित विद्यार्थी थिए।”
शाह २०१६ मा अन्य दुई नेपाली विद्यार्थीहरू सुनिल लम्साल र प्रविन श्रेष्ठसँगै कलेजमा प्रवेश गरेका थिए। प्राध्यापकहरूले उनको इन्टर्नशिप, समय पालन र परियोजनाप्रति प्रतिबद्धतालाई विशेष स्मरण गरेका छन्।
NMIT का उपाध्यक्ष सन्दीप शास्त्रीले भने, “आठ वर्षअघि यहाँ अध्ययन गरेका व्यक्ति आज आफ्नो देशको नेतृत्व गर्न लाग्नु हाम्रो संस्थाका लागि ठूलो सम्मान हो। उनी मेहनती, अनुशासित र प्रेरणादायी विद्यार्थी थिए।”
राजनीतिमा प्रवेश गर्नु अघि शाह नेपाली र्याप संगीतमा परिचित थिए। तर, क्याम्पसमा उनी कहिल्यै सार्वजनिक रूपमा प्रदर्शन गरेनन्। उनका अधिकांश गीत नेपालीमा थिए र सानो कक्षामा रहेको कारण उनको कलात्मक पक्ष धेरै निजी रह्यो।
भूकम्प इन्जिनियरिङमा विशेष रुचि राख्ने शाहले यससँग सम्बन्धित परियोजनाहरूमा काम गर्दै नेपालमा आएको भूकम्पको समयमा इन्टर्नशिप पनि गरेका थिए। यसले उनको देशप्रतिको योगदान र सामाजिक उत्तरदायित्वको भावना देखाउँछ।
शाह अहिले राष्ट्रिय राजनीतिमा उदाउँदा NMITले उनलाई भविष्यमा क्याम्पसमा पुनः स्वागत गर्ने आशा राखेको छ। उपाध्यक्ष शास्त्रीले भने, “उनी भारत भ्रमणमा आए भने हामी उनलाई निमन्त्रणा गर्नेछौँ। यो हाम्रो लागि सम्मान र विद्यार्थीहरूको लागि प्रेरणा हुनेछ।”
सम्बन्धित खबर
