चितवनको राप्ती नगरपालिका क्षेत्रमा कर्फ्यु आदेश
एसीपी संवाददाता
२२ असार २०७८, मंगलवार १५:४७ मा प्रकाशित
चितवनमा सुजिता हत्या काण्डले उग्ररुप लिन थालेपछि स्थानीय प्रशासनले कर्फ्यु लगाएको छ । जिल्लाको राप्ती नगरपालिकाका स्थानीयले सुजिता भण्डारीको हत्यारालाई पक्राउ गर्न माग गर्दै प्रदर्शन चर्काएपछि प्रशासनले कर्फ्यु आदेश जारी गरेको हो ।चितवनका प्रमुख जिल्ला अधिकारी प्रेमलाल लामिछानेले जारी गरेको कर्फ्यु आदेश आज साँझ ७ः३० बजेदेखि भोलि बेलुकी ७ः३० बजेसम्मका जारी रहने जिल्ला प्रशासन कार्यालय चितवनले जारी गरेको सूचनामा उल्लेख छ ।
कर्फ्यु आदेश पूर्वपश्चिम राजमार्गको राप्ती नगरपालिका १ लोथरपुलदेखि वडा नं ४ डढुवासम्मको राजमार्गको दायाँबायाँ ५ सय मिटरसम्म लागु हुने सूचनामा जनाईएको छ ।प्रमुख जिल्ला अधिकारी लामिछानेले भण्डारीको मृत्युको विषयलाई लिएर पूर्वपश्चिम राजमार्ग अवरुद्ध गर्ने, बिच सडकमा भिड जम्मा गरी हुलहुज्जत, ढुंगामुढा, सरकारी तथा नीजि सम्पत्ति र संरचना तोडफोड, आगजनी र हुलदंगा गरी सार्वजनिक शान्ति भंग हुने अवस्था आएकाले कर्फ्यु लगाउनु परेको बताए ।
आदेशमा कर्फ्यु अवज्ञा गर्ने व्यक्तिलाई सुरक्षाकर्मीले तत्काल पक्राउ गर्ने र एक महिना कैद वा जरिवाना साथै दुवै सजाय समेत हुने उल्लेख छ ।असार ११ गतेदेखि हराइरहेकी राप्ती नगरपालिका ३ निवासी २३ वर्षीया सुजिता भण्डारीको शव सोमबार ब्रम्हस्थानी सामुदायिक वनमा फेला परेको थियो ।
भण्डारीको हत्या भएको भन्दै स्थानीयबासिन्दाले घटनाको निष्पक्ष छानविन गरि दोषीलाई पक्राउ गर्न माग गरेका छन् । स्थानीयले बन्द गरेको सडक प्रहरीले खुलाउने क्रममा आज दिनभरी पटक पटक झडपसमेत भएको थियो । भिड नियन्त्रणमा लिन प्रहरीले केही सेल अश्रु ग्यास प्रहार गरेको थियो ।
सम्बन्धित खबर
