सगरमाथामा एकल कब्जा जमाउन चिनियाँ कुटिल चाल
एसीपी संवाददाता
१० जेष्ठ २०७९, मंगलवार ०६:१९ मा प्रकाशित
अन्तर्राष्ट्रिय जगत रुस र युक्रनमाथि केन्द्रित रहेको मौका छोपी चीनले विश्वको सबै भन्दा अग्लो हिमाल सगरमाथाको चुचुरोमा एकल कब्जा जमाउने कार्य सुरु गरेको छ ।
विश्वको सर्वोच्च शिखर सगरमाथाको चुचुरोमा चीनले एकपक्षीय रुपमा एउटा लाइन हाल्ने बताएर नेपाललाई अप्ठ्यारोमा पार्न सुरु गरेको हो।
सगरमाथा आरोहणको सिजन चलिरहेका बेला नेपालतर्फबाट जाने आरोहीसँग तिब्बततर्फबाट आउने आरोहीको सम्पर्क नहोस् भनेर चीनले ८ हजार ८ सय ४८ दशमलव ८६ मिटर अग्लो चुचुरोमा एउटा लाइन हाल्न लागेको चिनियाँ समाचार संस्था सिन्ह्वाले जनाएको छ। यसले चुचुरोलाई दुईभागमा लगाउने योजना बनाएको छ ।
अहिलेसम्मको इतिहासमा विश्वको सर्वोच्च शिखर सगरमाथा नेपालमा छ भनिएको छ । सीमाना र जग्गा जमिन हेर्दापनि इतिहास देखि नै सगरमाथाको पानी ढलो नेपालतर्फ रहेकाले यो नेपालको भूभाग हो भनिएको छ ।
यही पानी ढलोलाई आधार मानिएको छ । तर अब चीनले बीचमा गल्छी बनाएर चुचुरो आधा आधा बनाउँने र आफ्नो दावी गर्ने योजनामा रहेको बुझिन्छ ।
तिब्बततिरबाट केही गाइडहरू सगरमाथाको चुचुरोतिर गइरहेको र उनीहरूले बाँकी आरोहीका लागि चुचुरोमा लाइन बनाउने समाचारमा उल्लेख गरिएको छ।
अहिले २१ जना चिनियाँ नागरिकहरू सगरमाथा आरोहणको क्रममा छन्। चुचुरोमा चिनियाँहरूले कसरी लाइन कोर्छन् र त्यो पालना कसरी गराउँछन् भन्ने खुलिसकेको छैन।
चिनियाँ पक्षले यसपालि कुनै पनि विदेशीलाई आफ्नोतर्फबाट सगरमाथा आरोहणको अनुमति दिएको छैन। सगरमाथा आरोहण यसपालि नेपाल सरकारले भने विदेशीहरूका लागि खुला गरेको छ। यसपालिको पहिलो चरणमा केही नेपाली आरोहीले सगरमाथाको चुचुरोमा पाइला टेकिसकेका छन्।
आइस डाक्टरले सगरमाथा आरोहीका लागि डोरी राख्ने काम सकेका छन् । सगरमाथा आधार शिविरमा पुगेकालाई कोरोनाको संक्रमण भएको भन्दै विभिन्न अन्तर्राष्ट्रिय सञ्चारमाध्यममा समाचारहरू प्रकाशित भए पनि नेपाल सरकारले भने औपचारिक रूपमा त्यसबारे कुनै जानकारी दिएको छैन।
पर्यटन मन्त्रालयले सगरमाथा क्षेत्र कोरोनाबाट सुरक्षित रहेको बताएको थियो । सगरमाथाको उचाई फरक निकाल्न नेपाल र चीनले संयुक्त रुपमा सर्भे गरेका थिए ।
सम्बन्धित खबर
