वीरगञ्जमा जारी केन्द्रीय समिति बैठकमा रेणुले पार्टीको कुनै पनि पदीय जिम्मेवारीमा नबस्ने भन्दै उनले अध्यक्ष उपेन्द्र यादवलाई राजीनामा बुझाएकी हुन्।

भौतिक पूर्वाधारमन्त्रीबाट फिर्ता बोलाइएपछि रेणु असन्तुष्ट बनेकी छन्। बुधबारदेखि केन्द्रीय समिति बैठक सुरू भए पनि उनी बिहीबारमात्रै बैठकमा पुगेकी थिइन्।

व्यक्तिगत कारणले पदीय जिम्मेवारीमा रहेर काम गर्नसक्ने अवस्था नरहेकाले आफूले सबै पदबाट राजीनामा दिएको राजीनामा पत्रमा उनले भनेकी छन्।

‘वर्तमान अवस्थामा मेरो व्यक्तिगत कारणले गर्दा पदीय जिम्मेवारीमा रहेर काम गर्नसक्ने अवस्था नरहेको हुनाले यस जनता समाजवादी पार्टी (जसपा) को पदीय जिम्मेवारीबाट अलग हुने निर्णयमा पुगेको छु,’ अध्यक्ष यादवलाई उनले बुझाएको राजीनमा पत्रमा भनिएको छ,‘तसर्थ आजकै मितिदेखि लागू हुने गरी पार्टीले मलाई दिएको सम्पूर्ण पदीय जिम्मेवारीहरू त्याग गरेको व्यहोरा यहाँलाई जानकारी गराउँदछु।’

अध्यक्ष यादवसँगको सहकार्यबाट राजनीतिक र व्यत्तिगत जीवनमा धेरै कुरा सिक्ने र जान्ने मौका पाएको उनले उल्लेख गरेकी छन्।

संघीय सांसदसमेत रहेकी रेणु जसपाको केन्द्रीय कार्यकारणी र केन्द्रीय सदस्यको जिम्मेवारीमा थिइन्।

यस्तो छ रेणुले दिएको राजीनामा पत्र:

मितिः २०७९ असार ३०

आदरणीय अध्यक्ष ज्यू,

जनता समाजवादी पार्टी(जसपा) नेपाल

                                      विषयः पदीय जिम्मेवारीमा नबस्ने सम्बन्धमा ।

म रेणु कुमारी यादव करिव १५ वर्षदेखि आफ्नो मेहनत, लगनशीलताका साथ अनेकौँ कठिन परिस्थतीमा विभिन्न बाधा–अवरोध, उतार–चढाव र आरोह–अवरोह पार गर्दै पार्टीका हितका लागि पूर्ण रूपमा इमान्दारीता र  नैतिकताका साथ सक्रिय रुपमा जिम्मेवारीहरू पूरा गर्दै आइरहेकी यहाँलाई अवगत नै छ।

विभिन्न कालखण्डमा पार्टी पटक–पटक टुटफूट र अनेक किसिमको पडयन्त्रका सिकार भईरहँदा पनि आँफू विच्चलीत नभई सदैव मधेस र मधेसी जनता लगायत समपूर्ण उपेक्षित वर्ग र समूदायको हकहितका लागि पार्टीको पक्षमा चट्टानी अडान लिएको सर्वविदितै छ।