गफ दिएर बहुमत पाएको एमालेले ५ वर्षमा विकास होइन संविधान भत्काउने काम गर्यो: रमेश लेखक
एसीपी संवाददाता
१६ कार्तिक २०७९, बुधबार १०:५३ मा प्रकाशित
महेन्द्रनगर । नेपाली कांग्रेसका केन्द्रीय सदस्य एवं पुर्वमन्त्री रमेश लेखकले बितेको पाँच बर्षमा नेकपा एमालेले जनतालाई विकासका नाउँमा गफ मात्रै दिएको आरोप लगाएका छन् । कञ्चनपुर निर्वाचतन क्षेत्र नं. ३ बाट आसन्न मंसिर ४ गते हुने प्रतिनिधीसभाको निर्वाचनमा उम्मेदवार लेखकले अहिले नेकपा एमालेका अध्यक्ष केपी शर्मा ओलीका गलत क्रियाकलापका विरुद्ध गठबन्धन लडिरहेको बताए ।
‘गएको निर्वाचनपछि ओली जी प्रधानमन्त्री भएपछि संविधान भत्काउने र अहिलेको व्यवस्था कम्जोर बनाउने काम गर्नुभयो,’ नेता लेखकले मंगलबार दोधारा चादँनीमा घरदैलो कार्यक्रममा बोल्दै भने, ‘ओली जीले घर–घरमा पुर्याउँछु भनेको ग्याँसको पाइप दोधारा चादँनीमा तपाईहरु कतिको घरमा पुग्यो?’ समुन्द्र नभएको मुलुकमा पानी जहाज ल्याउनेदेखि चीनबाट रेल ल्याउनेसम्मका गफ एमालेले दिएको लेखकको आरोप थियो ।
‘बितेको पाँच बर्षमा विकासका कुनै काम यहाँ भएको भए मलाई देखाउनुहोस,’ उनले भने, ‘कञ्चनपुरलगायत सुदूरपश्चिममा हामीले गरेको विकासका हिसाब हामी दिन सक्छौं ।’ विगतका माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहाल प्रचण्ड प्रधानमन्त्री भएका बेला र आफूहरु मन्त्री, सांसद भएका वेला विकास भएको उनको दाबी थियो ।
त्यसैगरी चुनावी घरदैलो कार्यक्रममा बोल्दै कञ्चनपुर निर्वाचन क्षेत्र नं. ३ ख बाट सुदूरपश्चिम प्रदेशसभा सदस्यका उम्मेदवार बेलबहादुर रानाले यहाँबाट निर्वाचन जित्ने एमालेका नेताहरुले कुनै काम नगरेको जिकिर गरे ।
‘यहाँबाट पाँच बर्षमा दुई जना एमालेबाट माननीय भए । तर काम सिन्को भाचेँनन्,’ रानाले भने, ‘हामी चुनाव जितेर फर्केर नआउने पार्टीका नेता होइनौ, पराजित हुँदा होस वा जित्दा घर दैलोमा आएकै छौं ।’ आफू प्रदेशसभाको पाँच दलको साँझा उम्मेदवार भएको बताउँदै रानाले महाकालीमा झोलुङ्गे पुल, पक्की पुलदेखि नदी कटान नियन्त्रणलगायतका विकास गर्ने पार्टी कांग्रेस नै रहेको बताए ।
सम्बन्धित खबर
