“मलाई वास्तवमै घाम ताप्न मनपर्छ, मलाई भिटामिन डी मन पर्छ र वर्षभरि नै मलाई मेरो छाला घाममा डढाउन मन लाग्छ। त्यसैले म वास्तवमै गोपनीयता भएको र बिदा मनाउन सकिने जहाँसुकै र जुनसुकै ठाउँमा जान मन पराउँछु,” जाहरा रोज भन्छिन्।

यूकेकी यी ‘सोसल मिडिया इन्फ्लुएन्सर’ आफ्नो छालाको रोगन गाढा बढाउन चाहन्छिन् र आफ्नो मुस्लिम धर्मप्रति पनि कटिबद्ध रहन चाहन्छिन्। उनी ३० वटाभन्दा धेरै देशहरूमा ‘हलाल होलिडे’ अर्थात् मुस्लिम आस्था अनुकुलको व्यवहार गर्न पाइने सुविधा भएको बिदा मनाउन गइसकेकी छन्।

हलाल अरबी भाषाको शब्द हो र त्यसले इस्लाम धर्मावलम्बीहरूलाई ‘जायज छ’ भन्ने अर्थ दिन्छ।

‘हलाल होलिडे’ मा मुस्लिमहरू उनीहरूको धार्मिक विश्वास र अभ्यासमा कुनै सम्झौता नगरी विभिन्न ठाउँहरू घुम्न जान सक्छन्।

गोपनीयता

विश्वमा सबैभन्दा धेरै सङ्ख्या भएका धर्मावलम्बीमध्ये इसाईहरूपछि मुस्लिमहरू दोस्रो नम्बरमा आउँछन्। र धेरै मुस्लिम देशहरूमा मध्यम वर्ग बढिरहेको छ।

पश्चिमी युरोप तथा उत्तर अमेरिकाका दोस्रो र तेस्रो पुस्ताका मुस्लिमहरूसँग उनीहरूका अभिभावकको तुलनामा खर्च गर्न सकिने आम्दानी धेरै छ र त्यसलाई उनीहरू बिदा मनाउन घुमफिर गरेर खर्च गर्न सक्छन्।

यो फस्टाउँदो बजार हो।

“मेरो लागि नियमित होलिडे र हलाल होलिडेबीचको मुख्य भिन्नता भनेको गोपनीयताको हो,” जाहरा रोजले बीबीसी वर्ल्ड सर्भिस बिजनेस डेली कार्यक्रमलाई बताइन्।

उनका अनुसार उनी हलाल खानाको सहज पहुँच पनि खोज्ने गर्छिन्।

मुस्लिम पर्यटकहरूलाई एकजुट गर्ने कुरामा खाना मुख्य हो। उक्त धर्ममा सुँगुरको मासु र मदिरा वर्जित छ।

इस्तानबुलमा बस्ने हासेर सुकुओग्लु अडिगुजेल ३६ वर्षीया तीन सन्तानकी आमा हुन्।

टर्कीभित्र ‘हलाल होलिडे’ मनाउने ठाउँ फेला पार्न कुनै समस्या छैन। तर उनको परिवारले गैर-इस्लामिक देशमा भ्रमण गर्दा धेरै सोधखोज गरेर योजना बनाउनुपर्छ।

उनी भन्छिन्, “हालसालै हामी म्यासेडोनिया र कोसोभो गयौँ। हामीले हाम्रो होटलमा बिहानको खाजा खायौँ त्यसपछि परम्परागत ठाउँहरूमा घुम्न गयौँ, त्यहाँ मदिरा बिना नै खाना दिइयो।”

उनी दिनमा पाँच पटक प्रार्थना गर्छिन् र इस्लामिक मूल्य मान्यताहरू पालन गर्छिन।

“हलाल होटलहरूमा उनीहरूले प्रार्थनाका लागि म्याट उपलब्ध गराउँछन्। यदि हामी सामान्य होटेलहरूमा बस्न जान्छौँ भने हामी प्रार्थनाका लागि आफैँ म्याट लिएर जान्छौँ।”

“म कम लुगा लगाएका मानिसहरूलाई होटलमा हेर्न चाहन्न। हामी हाम्रा छोराछोरीहरू हाम्रो आस्था र संस्कृति पालन गर्ने मानिसहरूमाझ रहुन् भन्ने चाहन्छौँ। हामी उनीहरूलाई मानिसहरूले नाङ्गै घाम तापिरहेका समुद्री किनाराहरूमा लान चाहँदैनौँ।”

उनी महिलाहरूलाई अनलाइन उद्यमशीलता र सामाजिक सञ्जालबारे तालिम दिन्छिन्। हलाल होलिडेको सम्भावनालाई पर्यटन उद्योगले पूर्ण रूपमा प्रयोग गर्न नसकेको उनको भनाइ छ।

तस्बिर स्रोत,HACER SUCUOGLU ADIGUZEL

तस्बिर स्रोत,GETTY IMAGES

तस्बिर स्रोत,MAGDY RUSTUM

“त्यहाँ एउटा विशेष लिफ्ट पनि छ, त्यहाँबाट उनीहरू सीधै आफ्नो कोठामा जान सक्छन् त्यसले गर्दा उनीहरूलाई कसैले पनि देख्न सक्दैनन्।”

होटलको बलरूम विवाह समारोहको लागि प्रयोग गर्न सकिन्छ र त्यहाँ इस्लामिक परम्परा अनुसार पुरुष तथा महिला पाहुनालाई अलग अलग स्थानमा बस्ने व्यवस्था गर्न पनि सकिन्छ।

तस्बिर स्रोत,ZAHRA ROSE

यी सबै खालका परिमार्जनहरू गर्नुपर्दा थप पैसा खर्च हुन्छ त्यसलाई जाहरा रोज स्वीकार गर्छिन्।

“मलाई थाहा छ गोपनीयता दिने खालका बिदा मनाउने स्थानहरूको लागत अन्य सामान्य स्थानका तुलनामा उच्च हुन्छ,” उनी भन्छिन्।

“मिश्रित पौडि पोखरीहरू भएका वा तपाईँको आफ्नै गोपनीयता हुने पौडी पोखरी वा निजी बाल्कनी नभएका रिसोर्ट बुक गर्न धेरै सजिलो छ।

“त्यसैले हो, म भन्छु त्यसकारण पनि निश्चित रूपमा मूल्यमा भिन्नता त हुन्छ नै।”बिबिसी बाट साभार गरिएको छ ।