मोहम्मद रहिस हलवाई श्रम संस्कृति पार्टी बाँकेको जिल्ला उपाध्यक्ष नियुक्त
एसीपी संवाददाता
८ आश्विन २०८३, बिहीबार १७:०९ मा प्रकाशित
दिनेश ठाकुर, नेपालगन्ज, असोज ८ — श्रम संस्कृति पार्टी, बाँकेको जिल्ला सचिवालय बैठकले वरिष्ठ श्रमदाता मोहम्मद रहिस हलवाईलाई जिल्ला उपाध्यक्ष पदमा नियुक्त गरेको छ।
पार्टीले हलवाईलाई महत्वपूर्ण जिम्मेवारी प्रदान गर्दै उहाँको सफल कार्यकालको शुभकामना व्यक्त गरेको छ। लामो सामाजिक अनुभव, सक्रियता, इमानदारी, नेतृत्व क्षमता तथा श्रमप्रतिको समर्पणका कारण हलवाईबाट जिल्लाको संगठन निर्माण र विस्तारमा महत्वपूर्ण योगदान पुग्ने विश्वास पार्टीले लिएको छ।
श्रम संस्कृति पार्टी, बाँकेका संगठन विभाग संयोजक राजन रानामगरका अनुसार नवनियुक्त जिल्ला उपाध्यक्ष हलवाईलाई नेपालगन्ज उपमहानगरपालिकामा पार्टीको संगठनलाई थप मजबुत बनाउने जिम्मेवारीसमेत दिइएको छ।
नगर संयोजकसँगको समन्वय र सहकार्यमा नेपालगन्ज उपमहानगरपालिकाका २३ वटै वडामा वडा कमिटी गठन गर्दै संगठनलाई जनताको घरदैलोसम्म पुर्याउने अभियानमा हलवाईको महत्वपूर्ण भूमिका रहने अपेक्षा गरिएको रानामगरले बताउनुभयो।
रानामगरले बाँके जिल्लालाई पश्चिम नेपालमा श्रम संस्कृति पार्टीको मजबुत संगठनात्मक आधारका रूपमा स्थापित गर्ने अभियानमा हलवाईको नेतृत्व, सक्रियता र अनुभवले थप बल पुग्ने विश्वास व्यक्त गर्नुभयो।
उहाँका अनुसार श्रम, स्वाभिमान, उत्पादन, आत्मनिर्भरता र राष्ट्र निर्माणको अभियानलाई जनस्तरसम्म विस्तार गर्न नवनियुक्त जिल्ला उपाध्यक्ष हलवाईको भूमिका महत्वपूर्ण हुनेछ। उहाँको कार्यकाल सफल, सार्थक, परिणाममुखी र प्रभावकारी हुने विश्वाससमेत व्यक्त गरिएको छ।
संगठन विभाग संयोजक रानामगरले पदसँगै जिम्मेवारी, जिम्मेवारीसँगै परिणाम र परिणामसँगै जनविश्वास बढ्दै जानुपर्नेमा जोड दिँदै हलवाईलाई पुनः हार्दिक बधाई तथा सफल कार्यकालको शुभकामना व्यक्त गर्नुभयो।
श्रम संस्कृति पार्टी, बाँकेका संगठन विभाग संयोजक राजन रानामगरले हलवाईको नियुक्तिले जिल्लाको संगठन विस्तार र सुदृढीकरणमा थप ऊर्जा पुग्ने विश्वास व्यक्त गर्नुभएको छ।
सम्बन्धित खबर
