प्रजातान्त्रिक संघको कर दाखिला गर्न सरकारले दिन तोकी जारी गरेको निर्णय फिर्ता लिन माग
एसीपी संवाददाता
२१ जेष्ठ २०७७, बुधबार १५:४१ मा प्रकाशित
प्रजातान्त्रिक उद्योगी व्यवसायी संघ नेपालगन्जले कर दाखिला गर्न सरकारले दिन तोकी जारी गरेको निर्णय फिर्ता लिन माग गरेको छ ।
निर्णय फिर्ता लिन माग गर्दै संघले बुधवार आन्तरिक राजश्व कार्यालय नेपालगन्ज मार्फत अर्थमन्त्रीलाई ज्ञापन पत्र बुझाएको छ । अगुवा व्यवसायी ललित रौनियारले सरकारको आर्थिक वर्ष २०७७÷७८को वजेटले उद्योगी व्यवसायीलाई निरुत्साहित बनाएको भन्दै उहाँले अर्कोतर्फ कोरोनाले निम्ताएको विषम परिस्थितिमा राहत दिनुको साटो आहत बनाउने सरकारको निर्णय तत्काल फिर्ता लिन माग गर्नुभयो ।
सरकारले भनेको मितिमा कुनै हालतमा कर दाखिला गर्न सक्ने अवस्था नरहेको स्पष्ट पार्दै संघले सरकारले निर्णय फिर्ता नलिए चरणबद्ध आन्दोलन गर्ने चेतावनी दिएको छ । तीन महिनामा चल्दै गरेको लकडाउनले उद्योग–व्यवसाय चल्न नपाई मारमा परेको र आफ्नो हैसियतमा बाँच्न सक्ने अवस्था समेत नरहेको दावी गर्दै संघका अध्यक्ष पुरुषोत्तम शर्माले यस्तो अवस्थामा उल्टो कर दाखिलाको ताकेता गर्नु आपत्तिजनक भएको उल्लेख गर्नुभयो । उहाँले तीन महिना पछि मात्र कर लिन सरकारसँग माग गर्नुभयो ।
यद्यपी आन्तरिक राजश्व विभागले कर वुझाउने म्याद भने असार ७ गतेसम्म थप गरेको जनाएको छ ।
विभागले मंगलबार मात्र जेठ २५ गतेभित्र कर तिर्नुपर्ने, नभए जरिवााना लाग्ने सूचना निकालेको थियो । त्यसको चौतर्फी आलोचना भएपछि विभागले बुधबार नयाँ सूचना निकालेर कर तिर्ने समय बढाएको जनाएको छ ।
सम्बन्धित खबर
समुदाय-प्रहरी साझेदारी कार्यक्रम”
१ घण्टा अगाडि
दाङकी अभियन्ता उर्मिला चौधरी सम्मानित
२ घण्टा अगाडि
