भारत र रूसबीच रक्षा सहमति लागू: एकअर्काको भूमिमा ३,००० सैनिक तैनाथ गर्न सक्ने
एसीपी संवाददाता
६ बैशाख २०८३, आईतवार २२:४७ मा प्रकाशित
एजेन्सी – भारत र रूसबीच भएको ‘रेसिप्रोकल एक्सचेन्ज अफ लजिस्टिक सपोर्ट (RELOS)’ सम्बन्धी रक्षा सहमति औपचारिक रूपमा लागू भएको छ। यस सहमतिअनुसार अब दुवै देशले एकअर्काको भूमिमा अधिकतम ३,००० सैनिकसम्म तैनाथ गर्न सक्नेछन्।
सहमतिको प्रावधानअनुसार पाँच युद्धपोत र १० सैन्य विमानसम्म पनि एकअर्काको क्षेत्रमा तैनाथ गर्न अनुमति दिइएको छ। यससँगै दुवै देशका सेनाले एकअर्काका सैन्य बेस, एयरबेस तथा बन्दरगाह प्रयोग गर्न पाउनेछन्, जसले दीर्घकालीन सैन्य तैनाती तथा सञ्चालनलाई सहज बनाउने अपेक्षा गरिएको छ।
सम्झौतामा लजिस्टिक सहयोगलाई पनि विशेष प्राथमिकता दिइएको छ। यसको अन्तर्गत इन्धन, पानी, मर्मत सेवा, प्राविधिक स्रोत तथा अन्य आवश्यक आपूर्तिहरू उपलब्ध गराइनेछ। साथै, सैन्य विमानका लागि एयर ट्राफिक कन्ट्रोल र उडानसम्बन्धी सेवाहरू पनि प्रदान गरिने व्यवस्था छ।
उक्त सहमति सन् २०२५ फेब्रुअरीमा हस्ताक्षर गरिएको थियो भने सोही वर्ष डिसेम्बरमा रूसले यसलाई अनुमोदन गरेको थियो। यो सहमति प्रारम्भिक रूपमा पाँच वर्षका लागि लागू हुनेछ, जसलाई आपसी सहमतिमा थप विस्तार गर्न सकिनेछ।
यद्यपि, यो सम्झौता युद्ध प्रयोजनका लागि नभई शान्तिकालीन तालिम, संयुक्त अभ्यास तथा लजिस्टिक सहयोगका लागि मात्र प्रयोग गरिने स्पष्ट गरिएको छ।
विश्लेषकहरूले यसलाई भारत–रूसबीच सुदृढ बन्दै गएको रणनीतिक साझेदारीको महत्वपूर्ण कदमका रूपमा लिएका छन्, जसले दुवै देशबीचको सैन्य समन्वय र सहयोग अझ सुदृढ बनाउने विश्वास गरिएको छ।
#अग्नीबाँण
सम्बन्धित खबर
