२९ घण्टासम्म खाना नपाएको दाबी, दूतावाससँग सम्पर्क गर्न नदिएको आरोप
एसीपी संवाददाता
१० पुष २०८२, बिहीबार १९:११ मा प्रकाशित
भारत ट्राभल भ्लगर Anant Mittal, जसलाई सामाजिक सञ्जालमा On Road Indian नामले चिनिन्छ, अरुणाचल प्रदेशसम्बन्धी टिप्पणीका कारण चीनमा करिब १५ घण्टा नियन्त्रणमा राखिएको दाबी गरेका छन्। उनले यो अनुभवलाई अत्यन्तै पीडादायी र मानसिक रूपमा थकाउने भएको बताएका छन्।
अनन्त मित्तल डिसेम्बर १५ मा आफ्ना एक साथीलाई भेट्न चीन गएका थिए। तर ग्वाङझाउ विमानस्थलमा सामान्य आप्रवासन प्रक्रिया पूरा भइसकेपछि पासपोर्टमा छाप लगाउनुअघि अधिकारीहरूले उनलाई रोके। त्यसपछि उनलाई वरिष्ठ अधिकारीकहाँ पठाइयो र अन्ततः नियन्त्रण कक्षमा राखियो।
आफ्नो युट्युब भिडियो “Indian Tourist Detained in China for 15 Hours” मा मित्तलले बताएअनुसार, सुरुमा अधिकारीहरू मैत्रीपूर्ण देखिए पनि पछि उनको झोला जाँच गरियो र क्यामेरा, मोबाइल फोनलगायत उपकरण जफत गरियो। उनले भारतीय दूतावाससँग सम्पर्क गर्न नदिएको र लामो समयसम्म कसैले जानकारी नदिएको बताए।
मित्तलले आफू कुनै राजनीतिक दल वा एजेन्डासँग सम्बन्धित नभएको स्पष्ट पारे। आफू यात्राका अनुभव र कथाहरू मात्र सेयर गर्ने साधारण भ्लगर भएको भन्दै उनले भने, “मेरो उद्देश्य राजनीति होइन, संसारलाई आफ्नै आँखाबाट देखाउनु मात्र हो।”
उनका अनुसार, भारत र चीनबीच अरुणाचल प्रदेशलाई लिएर भूमि विवाद रहेको छ र त्यस्तो संवेदनशील विषयमा बोलेर गल्ती गरेको महसुस भएको छ। “त्यस विषयमा बोल्नु हुँदैनथ्यो। यस्तो विवादमा बोल्ने अधिकार मसँग छैन,” उनले भने।
मित्तलले भारतको उत्तर–पूर्वी क्षेत्रमा तीन वर्ष अध्ययन गरेको र त्यस क्षेत्रसँग गहिरो भावनात्मक सम्बन्ध रहेको पनि बताए। अरुणाचल प्रदेशका एक भारतीय नागरिक चीनमा नियन्त्रणमा परेको खबरपछि उनले चिन्ता व्यक्त गर्दै भिडियो बनाएका थिए। त्यही भिडियोका कारण आफूलाई नियन्त्रणमा लिइएको हुनसक्ने उनको विश्वास छ।
नियन्त्रणमा रहँदा उनले २९ घण्टाभन्दा बढी समयसम्म खाना नपाएको दाबी गरे। अन्ततः ग्वाङझाउ विमानस्थलको लाउञ्जमा पुगेपछि मात्र खाना खान पाएको उनले बताए। यद्यपि, चिनियाँ अधिकारीहरूले आफूलाई देश निकाला नगरी निर्धारित उडानमार्फत भारत फर्कन दिएकोमा उनले धन्यवादसमेत व्यक्त गरे।
“हामी धेरै साना मानिस हौं, हाम्रो कुनै औकात छैन,” भन्दै उनले अन्य भ्लगरहरूलाई राजनीतिक र विवादास्पद विषयमा नबोल्न चेतावनी दिए।
तर घटनामा अर्को पाटो पनि देखिएको छ। भारत टुडे टिभीसँग कुरा गर्ने स्रोतहरूका अनुसार, मित्तलमाथि गरिएको अतिरिक्त निगरानी उनको अरुणाचलसम्बन्धी टिप्पणी मात्र होइन, चीनबाट बनाइएका केही पुराना सामाजिक सञ्जाल पोस्टका कारण पनि हुनसक्छ। ती पोस्टमा उनले चीनका भिखारीहरू र उनीहरूले डिजिटल भुक्तानी स्वीकार गर्ने विषय देखाएका थिए, जसलाई विवादास्पद मानिएको बताइएको छ।
यो घटना केही समयअघि अरुणाचल प्रदेशकी एक भारतीय महिला प्रेमा शाङ्घाई विमानस्थलमा करिब १८ घण्टा नियन्त्रणमा परेको घटनासँग पनि जोडेर हेरिएको छ। प्रेमाले चिनियाँ अधिकारीहरूले “अरुणाचल चीनको भाग हो” भन्दै उनको भारतीय पासपोर्ट अमान्य भएको दाबी गरेको आरोप लगाएकी थिइन्।
अनन्त मित्तल हाल भारत फर्किसकेका छन् र आफू सुरक्षित रहेको बताएका छन्। उनले अब आफ्नो अर्को यात्रा रूसतर्फ गर्ने योजना बनाइरहेको जानकारी पनि दिएका छन्। हिमालपत्रीका बाट
सम्बन्धित खबर
