प्रधानमन्त्री शाहको भारत भ्रमण : पश्चिम नेपालका विकास मुद्दा उठाउन बाँकेका सरोकारवालाको साझा धारणा
नेपालगन्ज, ३० कात्तिक २०८३ — प्रधानमन्त्री बालेन्द्र शाहको आसन्न भारत भ्रमणका क्रममा नेपालगन्ज तथा पश्चिम नेपालको विकाससँग जोडिएका मुख्य मुद्दाहरूलाई उच्च प्राथमिकताका साथ उठाउन बाँकेका सरोकारवालाहरूले साझा धारणा बनाएका छन्।
नेपालगन्ज उद्योग वाणिज्य संघ, बाँकेका अध्यक्ष चिरञ्जीवी ओलीको अध्यक्षतामा आज (सोमबार) सम्पन्न सर्वदलीय तथा सर्वपक्षीय छलफलले नेपालगन्ज–दिल्ली सिधा हवाई उडान सञ्चालन, सुख्खा बन्दरगाह (ड्राइपोर्ट) निर्माणको पूर्णता र रेलमार्गको पहुँच विस्तार लगायतका विषयलाई भ्रमणको मुख्य एजेण्डा बनाउन दबाब सिर्जना गर्ने निर्णय गरेको हो।
छलफलमा बाँकेस्थित विभिन्न राजनीतिक दलका प्रतिनिधि, उद्योगी–व्यवसायी, नागरिक समाज तथा विभिन्न क्षेत्रका सरोकारवालाहरूको सक्रिय सहभागिता रहेको थियो। सहभागीहरूले यस क्षेत्रको आर्थिक, व्यापारिक तथा पर्यटन प्रवर्द्धनका लागि वर्षौँदेखि उठ्दै आएका यी मागहरू प्रधानमन्त्रीको भारत भ्रमणका क्रममा द्विपक्षीय छलफलको एजेण्डामा पर्नुपर्नेमा जोड दिएका छन्।
सरोकारवालाहरूसँगको छलफलबाट प्राप्त सुझावका आधारमा तयार पारिएको मागपत्रलाई भोलि (मंगलबार) बाँकेका प्रमुख जिल्ला अधिकारी (सीडीओ) मार्फत प्रधानमन्त्री शाहसमक्ष ध्यानाकर्षणपत्रका रूपमा बुझाउने कार्यक्रम तय गरिएको संघले जनाएको छ।


