क्यान्सरसँग जुध्दै कलाकार श्यामानन्द, उपचार सहयोगार्थ अपील
एसीपी संवाददाता
१४ आश्विन २०८०, आईतवार ०७:५७ मा प्रकाशित
नेपालगञ्ज । नेपालगञ्जका श्रष्टा श्यामानन्द सिंह ठकुरी अहिले क्यान्सरसँग जुधिरहेका छन् । ६९ वर्षिय वरिष्ठ कलाकार सिंहको एक महिना अघि पेटको आन्द्रामा क्यान्सर देखिएपछि अहिले विपी कोइराला मेमारियल क्यान्सर अस्पताल चितवनमा उपचार भइरहेको छ । हस्तकला, चित्रकला, गीत/संगीत, साहित्य र नाटय लगायतका सिर्जनात्मक क्षेत्रमा आफ्नो छुट्टै पहिचान बनाउन सफल कलाकार ठकुरीले आफ्नो घरको दोस्रो तलाका चार कोठालाई वर्षौंदेखि संग्रहालय बनाएका छन् । कला पारखी, शुभेच्छुक एवं आम नागरिकका लागि उनले निःशुल्क अवलोकनको अवसर दिँदै आएका थिए । संग्रहालयमा सिंहद्वारा सिर्जित हस्तकला, चित्रकलाका सयौं सिर्जनाहरु राखिएका छन् ।
क्यान्सरले थलिएका ठकुरीको अन्तिम इच्छा र कामना छ–’घरको संग्रहालयलाई राज्यले संरक्षण गरेर कहीँ स्थापित गरिदेओस् ।’ झण्डै सय सडक नाटक लेखन र अभिनय गरिसकेका सिंह ठकुरीले टेलिसिरियल ‘अभागन बने सुहागन’ को कथा लेख्नुका साथै कलाकारको भूमिका निर्वाह गरेका थिए । सो टेलिसिरियल नेपाल टेलिभिजन क्षेत्रीय प्रसारण केन्द्र कोहलपुरबाट प्रसारण भएको थियो ।
सम्बन्धित खबर
