पाकिस्तान र तालिबान सेनाबीच पुनः सीमा क्षेत्रमा तीव्र झडप
एसीपी संवाददाता
२१ मंसिर २०८२, शनिबार १६:५१ मा प्रकाशित
लोकतन्त्रनेपाल – पाकिस्तान र अफगानिस्तानस्थित तालिबान सेनाबीच पुनः सीमा क्षेत्रमा तीव्र झडप भएको छ। दुवै पक्षले एकअर्कालाई युद्धविराम उल्लङ्घन गरेको आरोप लगाएका छन्। पछिल्लो भिडन्तले दुई देशबीचको तनाव झनै चर्किएको छ।
झडपका कारण अफगान–पाकिस्तान सीमावर्ती शहर स्पिन बोल्डकका स्थानीयबासी रातारात घर छोड्न बाध्य भएका छन्। अफगानिस्तानको कान्दाहारस्थित एउटा चिकित्सा स्रोतले बीबीसी पश्तोलाई दिएको जानकारीअनुसार चार जनाको शव स्थानीय अस्पतालमा ल्याइएको छ।
तर पाकिस्तान पक्षमा कुनै हताहत भएको छ कि छैन—यसबारे अधिकारीहरूले अझै पुष्टि गरेका छैनन्।
दुवै देशबाट आरोप–प्रत्यारोप
पछिल्ला केही महिनादेखि पाकिस्तान र तालिबानबीच छिटपुट झडप भइरहे पनि यसपटकको द्वन्द्व लगातार चार घण्टा चलेको बताइएको छ। दुवै पक्षले राति तीव्र गोलीबारी भएको स्वीकार गरे पनि द्वन्द्व सुरु गरेको दोष एकअर्कालाई लगाएका छन्।
पाकिस्तानी प्रधानमन्त्री शाहबाज शरीफका प्रवक्ता मुशर्रफ जैदीले तालिबानले बिना उक्साहट गोलीबारी सुरु गरेको दाबी गरे।
उनले जारी गरेको विज्ञप्तिमा भनिएको छ—
“हाम्रा सशस्त्र बलहरूले तुरुन्त, प्रभावकारी र दृढ कारबाही गरेका छन्। पाकिस्तान आफ्नो सीमाको अखण्डता र नागरिकको सुरक्षामा पूर्ण रूपमा प्रतिबद्ध छ।”
यसैबीच, तालिबानका प्रवक्ताले भने पाकिस्तानले नै पुनः आक्रमण सुरु गरेको दाबी गर्दै आफूहरू “जवाफ दिन बाध्य” भएको बताए।
युद्धविराम पछिल्लै महिनामा नै भंग
कतार र टर्कीको मध्यस्थतामा पाकिस्तान र तालिबानबीच भएको युद्धविराम सम्झौतामा दुवै पक्ष सहमत भएको दुई महिनाभन्दा कम समयमै यो झडप भएको हो।
सहमतिपछि केही हदसम्म शान्ति कायम भए पनि हाल देखिएको भिडन्तले दुई देशबीचको अविश्वास अझै गहिरिंदै गएको संकेत दिएको छ ।
सम्बन्धित खबर
