भारतले युक्रेनबाट उद्धार गरिदिएपछि पाकिस्तानी नागरिकले दिए मोदीलाई धन्यवाद
एसीपी संवाददाता
२५ फाल्गुन २०७८, बुधबार ०६:३९ मा प्रकाशित
काठमाडौं । युक्रेनमा फसेका पाकिस्तानी नागरिकलाई भारतले उद्धार गरेको छ । एक पाकिस्तानी महिलाले उद्धारका लागि भारतका प्रधानमन्त्री नरेन्द्र मोदीलाई धन्यवाद दिएकी छन् ।
मोदीले पाकिस्तानसँग सम्बन्ध खराब भए पनि मानवीय नाताले छाती फराकिलो गरेर पाकिस्तानी नागरिकलाई युक्रेनबाट उद्धारमा सहयोग गरेका हुन् । युक्रेनबाट सुरक्षित उद्धार गरेकोमा ती महिलाले मोदीलाई धन्यवाद दिएकी हुन् ।
एक भिडियो जारी गर्दै अस्मा शरीफ नाम गरेकी पाकिस्तानी महिलाले युक्रेनको राजधानी किइभमा रहेको भारतीय दूतावाससहित भारतीय प्रधानमंत्री मोदीलाई धन्यवाद भनेकी छन् । मोदीको मद्दतले आज आफू सुरक्षित फर्किन पाएको उनले उल्लेख गरेकी छन् ।
अत्यन्तै खराब अवस्थाका बीच भारतीय अधिकारीले मद्दत गरेर उद्धार गरेकोमा उनले मोदीलाई धेरै धेरै धन्यवाद भनेकी छन् । अस्मालाई भारतीय अधिकारीले युद्धरत क्षेत्रबाट उद्धार गरेर बचाएका थिए । उनलाई सुरक्षित पश्चिमी युक्रेन पुर्याएर त्यहाँबाट स्वदेश फर्काइएको थियो ।
अस्मा जस्तै युक्रेनमा फसेका कैयन पाकिस्तानी नागरिकको उद्धार गरिएको भारतीय सञ्चारमाध्यमले जनाएका छन् ।
सम्बन्धित खबर
मस्जिद भित्र अनैतिक कार्य गर्ने मृत्यु दण्ड सजाय
२ दिन अगाडि
