अमेरिकी राष्ट्रपति डोनल्ड ट्रम्पले फेब्रुअरी १ देखि नै चीनमा निर्मित सामानको आयातमा १० प्रतिशत शुल्क लगाउनेबारे आफूले सोचिरहेको बताएका छन्।

आफ्नो प्रशासनमा त्यसबारेको छलफल “उनीहरूले मेक्सिको र क्यानडामा फेन्टनिल [नामक औषधि] पठाइरहेको तथ्यमा आधारित” रहेको बताए।

ट्रम्पले मेक्सिको र क्यानडामाथि २५ प्रतिशतले आयात कर लगाउने चेतावनी दिइरहँदा यस भनाइ आएको हो।

ट्रम्पले आफ्ना ती छिमेकी देशहरूलाई कागजातविहीन आप्रवासी र औषधि आफ्नो देशमा आउन दिइरहेको आरोप लगाउँदै त्यसो भनेका हुन्।

ट्रम्पले कुन देशलाई के भने?

मङ्गलवार वाशिङ्टनमा आयोजित पत्रकार सम्मेलनमा ट्रम्पले युरोपेली सङ्घ ईयूलाई समेत आयात शुल्क लगाउने वाचा गरे।

“चीन दुर्व्यवहारकर्ता हो, तर युरोपेली सङ्घ हामीप्रति निकै, निकै नराम्रो भइरहेको छ,” उनले भने।

“उनीहरूले हामीलाई निकै, निकै नराम्रो व्यवहार गरिरहेका छन्। त्यसैले उनीहरू आयात शुल्क लगाइनेमा पर्नेवाला छन्। त्यसको क्षतिपूर्ति गर्ने यही एउटा तरिका हो। निष्पक्षता कायम गर्ने यही मात्र तरिका हो।”

मङ्गलवार शपथग्रहण गरेलगत्तै नयाँ राष्ट्रपतिले सङ्घीय अधिकारीहरूलाई हाल कायम रहेका व्यापार सम्झौताहरूको समीक्षा गर्न र अमेरिकाका व्यापार साझेदारहरूबाट भएका अनुचित अभ्यास पहिचान गर्न निर्देशन दिएका छन्।

चुनावी प्रचारप्रसारका बेला ट्रम्पले चिनियाँ सामानमा ६० प्रतिशतसम्म आयात शुल्क लगाउने वाचा गरेका थिए।