शुक्रबार राति पनि लेबनानको राजधानी बेरुतको दक्षिणी क्षेत्रमा इजरायलले भीषण आक्रमण जारी राखेको समाचार संस्था अल जजिराले लेखेको छ । यसअघि बिहीबार रातिसमेत इजरायलले उक्त क्षेत्रमा हवाई आक्रमण गरेको थियो ।

बेरुतमा रहेर काम गरिरहेकी सिन्धुपाल्चोककी सानु तामाङले आफूहरू अहिलेसम्म सुरक्षित नै भए पनि बिहीबार रातिदेखि डर र त्रास बढेको बताइन् ।

‘बिहीबार र शुक्रबार ठूल्ठूलो आवाजमा विस्फोट सुन्दा डराएका छौँ, के गर्ने भनेर सोच्न सकिरहेका छैनौँ । केही साथी काममा जान छोडेका छन्’, उनले भनिन् ।

दिनको समयमा विस्फोटको आवाज नसुनिए पनि राति भयभीत पार्ने गरी बम पड्किने गरेको सानुले बताइन् । ‘एक हप्तादेखि दिनमा पनि बाहिर निस्केका छैनौँ, राति त सुत्नै नसक्ने गरी बम पड्किन्छ’, उनले भनिन् ।

रोजगारदाताले चिन्ता नलिन भनेकाले आफूले नेपाली दूतावाससँग तत्काल उद्धारको अनुरोध नगरेको उनले बताइन् । ‘म काम गर्ने घरको मालिक इसाई हुन् ।

म बस्ने क्षेत्रमा इसाईहरू बढी छन्, यता सिधै आक्रमण भएको छैन, अहिलेसम्म यही नै राहतको विषय हो’, उनले भनिन्, ‘सुन्नी मुसलमान बढी भएको क्षेत्रमा काम गर्ने साथीहरू पनि डराएका छन् तर ती क्षेत्रमा पनि सिधा आक्रमण नभएकाले उहाँहरू अहिलेसम्म सुरक्षित नै हुनुहुन्छ ।’

इजप्टिका लागि नेपाली राजदूत सुशील लम्सालले आफूहरू बेरुतमा रहेका नेपालीहरूसँग निरन्तर संवादमा रहेको र आवश्यक सतर्कता अपनाउन भनिरहेको बताए ।

‘असुरक्षित भएको अवस्थामा आवश्यक सहयोग उपलब्ध गराउने भनेका छौँ, उहाँहरूले नै हामी ठीक छौं भन्ने गर्नुभएको छ । उद्धार माग्नेलाई हामी सहयोग गर्न तत्पर छौँ’, उनले भने । लेबनानको जनसंख्या करिब ६० लाख छ । देशमा ५२ प्रतिशत मुस्लिम र ४४ प्रतिशत क्रिश्चिन बस्छन् ।