३१ जेष्ठ २०८१, बिहीबार

दार्चुलाको गलैनाथ माविको भवन निर्माण गर्न शिलान्यास, भारत सरकारको साढे दुई करोड सहयोगमा निर्माण हुने

एसीपी संवाददाता

७ बैशाख २०८१, शुक्रबार १४:२२ मा प्रकाशित

काठमाडौं। दार्चुलाको शैल्यशिखर नगरपालिकाकामा रहेको गलैनाथ माध्यमिक विद्यालयको विद्यालय भवनको शिलान्यास गरिएको छ।

नेपाल-भारत विकास सहकार्य अन्तर्गत भारत सरकारको २ करोड ७३ करोड आर्थिक सहयोगमा निर्माण हुन लागेको भवनको शैल्यशिखरका मेयर विजयसिंह धामी र भारतीय दूतावास काठमाडौंका द्वितीय सचिव प्रशान्तकुमार सोनाले शिलान्यास गरेका हुन्। मेयर धामीले प्राथमिकताका क्षेत्रमा नेपाली जनताको उन्नतिका लागि भारत सरकारले पुर्याउदै आएको निरन्तर विकास सहयोगको प्रशंसा गरे।

‘नेपाल–भारत विकास सहकार्य’ अन्तर्गतको भारत सरकारको अनुदान सहयोग यस विद्यालयलाई आवश्यक अन्य सुविधासँगै दुई तल्ले विद्यालय भवन, शौचालय, कार्यालय भवनको निर्माण र फर्निचरमा उपयोग गरिने जनाइएको छ।

भारत सरकार र नेपाल सरकारबीच भएको सम्झौता अन्तर्गत यस परियोजनालाई उच्च प्रभाव सामुदायिक विकास परियोजनाको रुपमा अघि बढाइनेछ। र, दार्चुलाकोे शैल्यशिखर नगरपालिकामार्फत कार्यान्वयन गरिने भारतीय दूतावासले जनाएको छ। ‘ यो परियोजना भारत र नेपालबीचको बलियो विकास साझेदारीको एक महत्वपूर्ण दृष्टान्तको रुपमा रहेको छ,’ दूतावासले विज्ञप्तिमा भनेको छ, ‘गलैनाथ माध्यमिक विद्यालयमा अध्ययनरत विद्यार्थीहरुका लागि गुणस्तरिय शिक्षा प्रदान गर्न विद्यालयको नयाँ भवन उपयोगी हुनुका साथै यसले सिकाइका लागि राम्रो वातावरण सिर्जना गर्नेछ । साथै यस क्षेत्रको शिक्षाको विकासमा पनि योगदान पुर्याउनेछ।’

सन् २००३ यता भारत सरकारले नेपालका विभिन्न क्षेत्रमा ५५१ वटा भन्दा बढी उच्च प्रभाव सामुदायिक विकास परियोजना अघि बढाएको छ र ४८९ वटा परियोजना सम्पन्न गरिसकेको छ। यी मध्ये सुदूरपश्चिम प्रदेशका विभिन्न क्षेत्रमा ४० वटा परियोजना रहेका छन् जसमा १० वटा परियोजना दार्चुलामा छन् ।

यसका साथै भारत सरकारले स्वतन्त्रता दिवस र गणतन्त्र दिवसको अवसरमा नेपालका विभिन्न अस्पताल, स्वास्थ्य चौकी र शैक्षिक संस्थालाई १००९ वटा एम्बुलेन्स र ३०० वटा स्कुल बस उपहारस्वरुप प्रदान गरिसकेको छ जसमध्ये सुदूरपश्चिम प्रदेशलाई ६० वटा एम्बुलेन्स र २० वटा स्कुल बस उपहारस्वरुप प्रदान गरिएको छ । यसमा ८ वटा एम्बुलेन्स र २ वटा स्कुल बस दार्चुला जिल्लालाई उपलब्ध गराइएको छ।

0 0 votes
Article Rating
Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x