मिसन ८४ को चुनावी सरगर्मी बढ्दै : नेपालगन्जको मेयरमा रमेश कुमार गुप्ताको चर्चा सुरु
नेपालगन्ज , मसिर ५ गते — आगामी २०८४ सालमा हुने स्थानीय तहको निर्वाचनलाई लक्षित गर्दै बाँकेको नेपालगन्ज उपमहानगरपालिकामा चुनावी गतिविधि र भावी नेतृत्वबारे चर्चा हुन थालेको छ। यसैक्रममा आगामी निर्वाचनमा नगर प्रमुख (मेयर) पदका सम्भावित उम्मेदवारका रूपमा रमेश कुमार गुप्ताको नाम चर्चामा आउन थालेको छ।
‘विकास, समृद्धि र सबल नेपालगन्जको लागि’ भन्ने मूल नारा सहित सार्वजनिक भएको पोस्टरले गुप्ताको सम्भावित उम्मेदवारीबारे स्थानीय राजनीतिक तथा सामाजिक वृत्तमा चासो बढाएको छ। नगरका विभिन्न चोक, चिया पसल तथा सार्वजनिक छलफलमा समेत उनको नामलाई लिएर चर्चा हुन थालेको बताइएको छ।स्थानीय तहको आगामी नेतृत्व कस्तो हुनुपर्छ भन्ने बहस चलिरहेका बेला गुप्ताको नाम चर्चामा आउनुलाई नेपालगन्जको भावी राजनीतिक समीकरणसँग जोडेर हेरिएको छ। विशेषगरी नगरको विकास, समृद्धि, पूर्वाधार निर्माण, सुशासन र नागरिकका आधारभूत आवश्यकतालाई सम्बोधन गर्ने विषय आगामी निर्वाचनका प्रमुख एजेन्डा बन्न सक्ने देखिन्छ।
यस विषयमा स्थानीय स्तरमा विभिन्न धारणा सार्वजनिक हुन थालेका छन्। सम्भावित उम्मेदवारीको चर्चा भइरहँदा गुप्ताको चुनावी योजना, विकास सम्बन्धी दृष्टिकोण र औपचारिक राजनीतिक घोषणाबारे भने थप स्पष्टता आउन बाँकी छ।
आगामी निर्वाचन नजिकिँदै जाँदा नेपालगन्जमा सम्भावित उम्मेदवारहरूको चर्चा र राजनीतिक गतिविधि थप बढ्ने देखिएको छ।


