३१ जेष्ठ २०८१, बिहीबार

युनियनको स्थापना दिवसमा पत्रकारहरुको लागि निःशुल्क स्वास्थ्य परीक्षण

एसीपी संवाददाता

१३ जेष्ठ २०८१, आईतवार १८:१७ मा प्रकाशित

नेपालगञ्ज । नेपाल प्रेस युनियनको ३३ औं स्थापना दिवसको अवसरमा बाँकेमा पत्रकारहरुका लागि निःशुल्क स्वास्थ्य परीक्षण शिविर गरिएको छ । स्थापना दिवसको अवसरमा युनियन बाँकेले सम्पूर्ण पत्रकारहरुका लागि आइतबार नेपालगञ्जमा निःशुल्क स्वास्थ्य परीक्षण शिविर संचालन गरेको हो । 

युनियन बाँकेका अध्यक्ष प्रियास्मृति ढकालको अध्यक्षतामा संचालन भएको शिविरको उद्घाटन शत्रमा बोल्दै नेपाली काँग्रेस लुम्बिनी प्रदेश सदस्य एवम् स्वास्थ्य बिभाग प्रमुख अन्जना पाण्डेले आफ्ना लागि कुनै सेड्युल नहुने पत्रकारहरु लक्षित शिविरको सराहना गर्नुभयो । 

“राज्यको चौथो अंगका रुपमा रहेको पत्रकारिता क्षेत्रमा लाग्ने पत्रकारहरुलाई आफ्ना लागि समय नै हुँदैन,” स्वास्थ्य बिभाग प्रमुख पाण्डेले भन्नुभयो, प्रेस युनियनले सधै अरुलाई सुसुचित गर्ने जिम्मेवारी बोक्ने पत्रकारहरुका लागि स्वास्थ्य शिविर आयोजना गर्नु आफैमा एकदमै राम्रो कार्य हो ।”

पत्रकाहरुको कार्यप्रति उच्च सम्मान रहेको बताउँदै उहाँले पत्रकारिताको आचारसंहितालाई ध्यान दिनुपर्छ नाकी संचारमाध्यमको फोलोवर र सब्सक्राईब बढाउनका लागि सत्य तथ्यलाई भुल्न नहुने उहाँको जोड थियो ।

कुनै बेला आफु पनि पत्रकार बन्न लालयित रहेको कुरा केलाउँदै स्वास्थ्य बिभाग प्रमुख पाण्डेले समय र अवस्थाले आफ्नो संलग्नता स्वास्थ्य क्षेत्रमा भएको बताउनुभयो । पत्रकारका लागि आचारसंहिता रहेको र सो नीति नियमभित्र रहेर कार्य गरिएकै कारण राज्यले पत्रकारितालाई चौथो अंङ्गका रुपमा परिभाषित गरेको उहाँले उल्लेख गर्नुभयो ।

नेपाल प्रेस युनियन लुम्बिनी प्रदेशका महासचिव नविन गिरीले पत्रकारिता क्षेत्रमा देशकै जेठो संगठनका रुपमा रहेको युनियनले नेपाली पत्रकारिता क्षेत्रमा इतिहास बाेकेकाे बताउनुभयो । उहाँले लोकतान्त्रिक आन्दोलन पश्चात उदय भएको युनियनले देशमा लोकन्तन्त्रका लागि पनि ठुलो भूमिका निर्वाह गरेको धारणा राख्नुभयो ।

उद्घाटन शत्रमा नेपाल पत्रकार महासंघ बाँके शाखा उपाध्यक्ष संगिन शर्माले युनियनले आयोजना गरेको स्वास्थ्य शिविर कार्यक्रमका लागि धन्यवाद दिनुभयो । उहाँले युनियन बाँकेले निरन्तर रचनात्मक कार्य गर्दै आएको उल्लेख गर्दै स्थापना दिवसको शुभकामना दिनुका साथै युनियनको कार्यलाई अन्यले समेत सिको गर्नुपर्ने बताउनुभयो ।पत्रकार महासंघका पूर्व अध्यक्षहरुको तर्फबाट अग्रज पत्रकार निरज गौतम, प्रेस सेन्टर लुम्बिनी प्रदेशका उपाध्यक्ष प्रदिप वाग्लेले स्वास्थ्य परीक्षण शिविरले पत्रकारहरुलाई स्वास्थ्यतर्फ सचेत हुनुपर्ने भावनाकाे विकास गर्न प्रेरित गर्ने कुरामा जोेड दिनुभएको थियो ।

शिविरमा युनियन लुम्बिनी प्रदेशका उपाध्यक्ष जयसिंह केसी, महासंघ लुम्बिनी प्रदेश उपाध्यक्ष शुक्रऋषि चौलागाई, युनियन लुम्बिनी प्रदेश सदस्य गौरव गिरी, युनियन कर्णाली प्रदेश सचिव रमा केसी, महासंघ लुम्बिनी प्रदेशका सचिव शिव सुनार, महासंघका पूर्व महासचिव पोषण केसी, महासंघ बाँके शाखा अध्यक्ष दामोदर भण्डारी, प्रेस चौतारी बाँकेका अध्यक्ष दुर्गा रोकाय, युनियन बाँके शाखाका निर्वतमान अध्यक्ष अर्जुन ओली लगायतको सहभागिता रहेको थियो ।

नेपालगञ्ज गणेशमान चोकमा रहेको लक्ष्मी सरस्वती पोलिक्निनिक एण्ड डाइग्नोष्टिक सेन्टरको सहकार्यमा गरिएको स्वास्थ्य शिविरमा पश्चिम नेपालका एक मात्र नेफ्रोलोजिष्ट (मृगौला रोग बिशेषज्ञ) डा.शौरभ सिंह हमालले बिशेषज्ञ सेवा प्रदान गर्नुभएको थियो ।

पछिल्लो समय मानिसको मृत्यु हुने सातौं समस्याका रुपमा मृगौला रोग देखिएको डा. हमालले जानकारी दिनुभयो । युनियन बाँके शाखा उपाध्यक्ष कमल खत्रीले स्वागत गर्नुभएको कार्यक्रमलाई सचिव भिष्म लोधले संचालन गर्नुभएको थियो ।

३३ औं स्थापना दिवसको अवसरमा युनियन बाँकेले मैत्रीपूर्ण फुटसल प्रतियोगिता र पत्रकार लक्षित स्वास्थ्य शिविर संचालन गरेको छ । आइतबर संचालन भएको स्वास्थ्य शिविरमा बाँकेका ५५ बढी पत्रकारहरुले सेवा लिएका छन् ।

0 0 votes
Article Rating
Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x