नेपालगञ्जमा शनिबार पर्न लागेको मुस्लिम धर्मावलम्बीहरूको महान पर्व बकर ईद (ईद-उल-अजहा) धुमधामका साथ मनाइने तयारी
एसीपी संवाददाता
२२ जेष्ठ २०८२, बुधबार १०:१८ मा प्रकाशित
नेपालगञ्ज, मुस्लिम समुदायको महत्वपूर्ण धार्मिक पर्व बकर ईद (ईद-उल-अजहा) यस वर्ष शनिबार, जेष्ठ 24 गते देशभर विशेष श्रद्धा र उत्साहका साथ मनाइने तयारी भइरहेको छ। नेपालगञ्जमा समेत यस पर्वको विशेष तयारी गरिएको छ।
नेपालगञ्जको प्रमुख ईदगाहमा बकर ईदको विशेष नमाज (प्रार्थना) बिहान ७ बजे सम्पन्न गरिने कार्यक्रम तय गरिएको छ। यसैगरी, नेपालगञ्ज जमाअ मस्जिदमा नमाज ७:३० बजे बिहानदेखि सुरु हुने जनाइएको छ।
बकर ईद, जसलाई ‘कुर्बानीको ईद’ पनि भनिन्छ, इस्लाम धर्मावलम्बीहरूका लागि अत्यन्तै पवित्र पर्व हो। यो दिन हजरत इब्राहीम (अलैहिस्सलाम) द्वारा परमेश्वरको आज्ञा पालन गर्दै आफ्नो छोरालाई कुर्बानी दिन तयार भएको घटनाको सम्झनामा मनाइन्छ। पर्वको दिन विशेष नमाजपछि सामर्थ्यानुसार बाख्रा, खसी, गाई वा भैंसीको कुर्बानी दिइन्छ र त्यसको मासु गरिब, आफन्त र परिवारमा बाँडिन्छ।
नेपालगञ्जमा सुरक्षाको व्यवस्था कडा पारिएको छ भने नगरप्रशासन, मुस्लिम धर्मगुरुहरू, र स्थानीय संघसंस्थाहरूबीच सहकार्य गर्दै ईद पर्वलाई सुरक्षित, शान्तिपूर्ण र धार्मिक सौहार्दमा सम्पन्न गराउने तयारी गरिएको छ।
ईदको अवसरमा सम्पूर्ण नेपाली दाजुभाइ दिदीबहिनीहरूमा सुख, शान्ति र सहिष्णुताको कामना गर्दै, नेपालगञ्जवासी मुस्लिम समुदायलाई ईद-उल-अजहाको शुभकामना!
सम्बन्धित खबर
