नेपालगन्जको आगामी स्थानीय निर्वाचनमा इरफान अहमद शेष ‘बुलडोजर बाबा’को नाम चर्चामा
एसीपी संवाददाता
८ आश्विन २०८३, बिहीबार १३:०८ मा प्रकाशित
दिनेश ठाकुर, नेपालगन्ज, असोज ८ — राष्ट्रिय जनमत पार्टीका केन्द्रीय संरक्षक तथा युवा नेता इरफान अहमद शेष उर्फ ‘बुलडोजर बाबा’को नाम नेपालगन्ज उपमहानगरपालिकाको आगामी स्थानीय निर्वाचनका लागि सम्भावित उम्मेदवारका रूपमा चर्चामा आउन थालेको छ।
लामो समयदेखि सामाजिक तथा जनसरोकारका विषयमा सक्रिय रहँदै आएका शेषले किसान, मजदुर, ई–रिक्सा व्यवसायी, सीमावर्ती क्षेत्रका समस्या, सुकुम्बासी तथा भूमिहीन नागरिक, युवा–विद्यार्थी, फुटपाथ व्यवसायी तथा अन्य साना व्यापारीका विषयमा आवाज उठाउँदै आएको बताइन्छ।
जनताका दैनिक समस्या तथा स्थानीय सरोकारका विषयमा निरन्तर रूपमा सक्रिय रहँदा शेषको पहिचान पीडित तथा समस्यामा परेका नागरिकका पक्षमा आवाज उठाउने युवा नेताका रूपमा स्थापित भएको उनका समर्थकहरूको दाबी छ।
विशेषगरी नेपालगन्ज क्षेत्रका विभिन्न सामाजिक तथा आर्थिक मुद्दामा उनले लामो समयदेखि सक्रियता देखाउँदै आएको बताइएको छ।
शेषको राजनीतिक यात्रा जनमत पार्टीका अध्यक्ष डा. सीके राउतको राजनीतिक उदयसँगै अघि बढेको बताइन्छ। पछिल्लो समय उनी राष्ट्रिय जनमत पार्टीको केन्द्रीय संरक्षकको भूमिकामा समेत रहेका छन्।
आगामी स्थानीय निर्वाचनलाई लक्षित गर्दै नेपालगन्ज उपमहानगरपालिकामा विभिन्न राजनीतिक दल तथा सम्भावित उम्मेदवारको चर्चा भइरहेका बेला शेषको नाम पनि सम्भावित उम्मेदवारका रूपमा चर्चामा आउन थालेको हो।
किसान, मजदुर, ई–रिक्सा चालक, भूमिहीन तथा सुकुम्बासी, युवा–विद्यार्थी र साना व्यवसायीसँग सम्बन्धित मुद्दामा निरन्तर आवाज उठाउँदै आएका कारण उनको सम्भावित उम्मेदवारीलाई लिएर स्थानीय राजनीतिक वृत्तमा चासो बढेको बताइएको छ।
यद्यपि, आगामी स्थानीय निर्वाचनमा नेपालगन्ज उपमहानगरपालिकाका लागि उनको उम्मेदवारीबारे पार्टीबाट औपचारिक निर्णय भने हुन बाँकी रहेको छ। उम्मेदवार छनोट तथा निर्वाचनसम्बन्धी अन्तिम निर्णय पार्टीको आधिकारिक प्रक्रिया र निर्णयबाट स्पष्ट हुने देखिन्छ।
सम्बन्धित खबर
