नेपालगन्ज वडा नं. ८ को हिन्दु श्मशानघाटमा आधुनिक विकास र सौन्दर्यीकरण तीव्र, विपन्नलाई निःशुल्क दाउरा उपलब्ध गराउने व्यवस्था
एसीपी संवाददाता
२० श्रावण २०८३, बुधबार ००:०३ मा प्रकाशित
नेपालगन्ज — नेपालगन्ज उपमहानगरपालिका वडा नम्बर ८ मा रहेको ऐतिहासिक तथा धार्मिक महत्त्व बोकेको हिन्दु श्मशानघाटको विकास, सौन्दर्यीकरण र थप सेवा विस्तारको कामले तीव्र गति लिएको छ। वडा नम्बर ८ का वडा अध्यक्ष रजनीश बाजपेयीको विशेष पहल र सक्रियतामा श्मशानघाटलाई व्यवस्थित र आधुनिक बनाउने कार्य भइरहेको छ, जसबाट स्थानीयवासीहरू हर्षित भएका छन्।
लामो समयदेखि भौतिक पूर्वाधार र व्यवस्थित संरचनाको अभावमा सास्ती भोग्दै आएको यस श्मशानघाटमा हाल वडा अध्यक्ष बाजपेयीको नेतृत्वमा महत्वपूर्ण विकास निर्माणका कामहरू सम्पन्न भएका छन्। दाहसंस्कारका लागि आउने नगरवासीहरूलाई सहजता प्रदान गर्नका लागि घाटको चारैतिर घेराबार, पक्की शेड निर्माण, विश्राम स्थल, र आवश्यक सरसफाइका भौतिक संरचनाहरू तयार गरिएका छन्।
यसैक्रममा, श्मशानघाट परिसरलाई अझ बढी पवित्र र आध्यात्मिक बनाउने उद्देश्यले श्मशानघाटभित्र काल भैरवको मन्दिर निर्माणको कार्य पनि पूर्ण रूपमा सम्पन्न भइसकेको छ। अब छिट्टै नै उक्त मन्दिरमा काल भैरवको मूर्ति स्थापना हुने तयारी भइरहेको वडा कार्यालयले जनाएको छ। मन्दिर निर्माणसँगै यस स्थलको धार्मिक महत्त्व अझ बढेर जाने विश्वास गरिएको छ।
यसका साथै, वडा अध्यक्ष रजनीश बाजपेयीको विशेष पहलमा वडा कार्यालयबाट विपन्न परिवारका लागि दाहसंस्कारमा दाउरा निःशुल्क उपलब्ध गराउने व्यवस्था मिलाइएको छ। यो मानवीय तथा जनहितकारी निर्णयले आर्थिक रूपले कमजोर परिवारलाई ठूलो राहत पुर्याएको छ।
वडा अध्यक्ष बाजपेयीले पदभार सम्हालेदेखि नै वडावासीका सुख–दुःखमा साथ दिँदै आएका छन्। विशेष गरी अन्तिम संस्कार जस्तो संवेदनशील स्थलको व्यवस्थापन, धार्मिक पूर्वाधार निर्माण र विपन्न नागरिकलाई सहयोग गर्ने कार्यलाई उनले आफ्नो उच्च प्राथमिकतामा राखेर काम गरेका हुन्। यस विकास कार्यले श्मशानघाटलाई व्यवस्थित मात्र बनाएको छैन, यसको गरिमालाई समेत उच्च बनाएको छ।
स्थानीय नागरिकहरूले वडा अध्यक्ष रजनीश बाजपेयीको यो जनपक्षीय र प्रशंसनीय कदमको खुलेर प्रशंसा गरेका छन्। विकास निर्माण र मानवीय सेवाका मामिलामा सधैं तत्पर रहने वडा अध्यक्ष बाजपेयीको दृढ इच्छाशक्ति र सक्रियताका कारण वडा नं. ८ का विभिन्न क्षेत्रमा सकारात्मक परिवर्तन आउन थालेको स्थानीयहरूको भनाइ छ।
सम्बन्धित खबर
