पहलगाम आतंकवादी आक्रमणको विरोधमा वीरगञ्जमा प्रदर्शन, सुरक्षाकर्मीको अवरोधलाई बेवास्ता गर्दै राष्ट्रिय एकता अभियानको ¥याली
एसीपी संवाददाता
१९ बैशाख २०८२, शुक्रबार ०९:५८ मा प्रकाशित
वीरगञ्ज, पर्सा —
हालै जम्मू–कश्मीरको पहलगाममा भएको बर्बर आतंकवादी हमलाको विरोधमा राष्ट्रिय एकता अभियानले सोमबार बाराको सिमरादेखि पर्साको वीरगञ्जसम्म विरोध ¥याली आयोजना गर्यो। उक्त आक्रमणमा ९ जना भारतीय सुरक्षाकर्मी, ७ जना निहत्था नागरिक र १ जना नेपाली महिला सुदूरपश्चिमाञ्चल विश्वविद्यालयमा अध्ययनरत विद्यार्थी सुदीपानी न्यौपानेको ज्यान गएको थियो। पाकिस्तान समर्थित आतंकवादी समूहले गराएको उक्त घटनाको घोर भर्त्सना गर्दै नेपालमा पनि यस प्रकारको आतंकवादविरुद्ध आवाज उठाउन अभियान सडकमा उत्रिएको हो।
सिमराबाट सुरु भएको ¥यालीलाई सुरक्षाकर्मीले जितपुर नजिकै रोक्ने प्रयास गरे। प्रहरीले केही प्रदर्शनकारीलाई नियन्त्रणमा लिए पनि सहभागीहरूले वैकल्पिक बाटो प्रयोग गरी वीरगञ्जको ऐतिहासिक घण्टाघरसम्म पुगेर विरोध प्रदर्शन गरेका थिए।
प्रदर्शनमा सहभागीहरूले ‘पाकिस्तान आतंकवादको जन्मस्थल’, ‘इस्लामी आतंकवाद मुर्दाबाद’, ‘पहलगामका शहीदहरू अमर रहुन्’, ‘निर्दोष नागरिकको हत्या बन्द गर’ जस्ता नारा लगाएका थिए। विरोध कार्यक्रममा राष्ट्रिय एकता अभियानका अध्यक्ष विनय यादवले पहलगाम आक्रमणको योजना पाकिस्तानले बनाएको आरोप लगाए। “पाकिस्तानले दक्षिण एसियामा अस्थिरता फैलाउने रणनीतिको हिस्साको रूपमा यो आक्रमण गराएको हो,” अध्यक्ष यादवले भने, “नेपालले पनि आतंकवादको स्पष्ट रूपमा विरोध गर्नुपर्छ।”
उनले ¥याली रोकेर सरकारले नागरिकको अभिव्यक्ति स्वतन्त्रता हनन गरेको दाबी गरे। तर, स्थानीय प्रशासनले भने ¥याली बिना अनुमति आयोजना गरिएको र सुरक्षा संवेदनशीलतालाई ध्यानमा राखेर हस्तक्षेप गर्नुपरेको बताएको छ।
घण्टाघरमा भएको विरोध सभामा सहभागीहरूले पहलगाममा मारिएका सुरक्षाकर्मी, नागरिक र नेपाली विद्यार्थी न्यौपानेप्रति मौखिक श्रद्धाञ्जली अर्पण गरेका थिए। उनीहरूको सम्झनामा एक मिनेट मौनधारण पनि गरिएको थियो।
नेपालमा पाकिस्तानविरुद्ध यसरी सार्वजनिक रूपमा विरोध प्रदर्शन गर्ने घटना कमै हुने गरेको छ। राष्ट्रिय एकता अभियानको यो प्रदर्शनले दक्षिण एसियामा आतंकवाद र यसलाई समर्थन गर्ने शक्तिहरूप्रति नेपाली समाजलाई थप सचेत बनाउने प्रयास गरेको देखिन्छ।
सम्बन्धित खबर
