स्थानीय तह निर्वाचनको चर्चा चिया गफदेखि चुनावी रणनीतिसम्म
एसीपी संवाददाता
२२ आश्विन २०८३, बिहीबार १२:१८ मा प्रकाशित
दिनेश ठाकुर नेपालगन्ज, २२ असोज — आगामी स्थानीय तह निर्वाचनलाई लक्षित गर्दै गाउँदेखि सहरसम्म राजनीतिक तथा सामाजिक गतिविधि बढ्न थालेका छन्। निर्वाचनको मिति नजिकिँदै जाँदा चिया पसल, भेटघाट तथा साथीभाइबीच हुने अनौपचारिक छलफलमा समेत सम्भावित उम्मेदवार, स्थानीय विकासका मुद्दा र चुनावी एजेन्डाबारे चर्चा हुन थालेको छ।
यसैक्रममा आगामी स्थानीय तह निर्वाचनका विषयमा केन्द्रित रहेर साथीभाइबीच चिया गफ तथा अनौपचारिक छलफल कार्यक्रम सम्पन्न भएको छ। छलफलमा स्थानीय विकास, युवाको भूमिका, जनताको अपेक्षा तथा समाज रूपान्तरणका लागि आवश्यक नेतृत्वका विषयमा विचार आदान–प्रदान गरिएको थियो।
छलफलमा सहभागीहरूले निर्वाचनलाई केवल नेतृत्व चयन गर्ने प्रक्रियाका रूपमा मात्र नभई स्थानीय आवश्यकता र जनसरोकारका विषयलाई प्राथमिकतामा राख्ने अवसरका रूपमा लिनुपर्ने धारणा राखेका थिए।
एक सहभागीले भने, “अब हुने निर्वाचनमा व्यक्ति र दलसँगै स्थानीय एजेन्डा पनि महत्वपूर्ण विषय बन्नुपर्छ। जनताका दैनिक समस्या, विकास र सेवा प्रवाहलाई प्राथमिकतामा राखेर उम्मेदवार तथा नेतृत्वबारे बहस हुन आवश्यक छ।”
त्यस्तै अर्का सहभागीले “युवाको सहभागिता र नयाँ सोच अहिलेको आवश्यकता हो। निर्वाचनको समयमा मात्र होइन, निरन्तर रूपमा जनतासँग जोडिएर काम गर्ने नेतृत्वबारे छलफल हुनुपर्छ,” भने।
चिया गफका क्रममा स्थानीय सडक, शिक्षा, स्वास्थ्य, रोजगारी, खानेपानी, सरसफाइ तथा युवाका अवसरलगायतका विषयमा समेत छलफल भएको सहभागीहरूले बताएका छन्।
साथीभाइबीचको आत्मीय भेटघाटका रूपमा सुरु भएको उक्त छलफल आगामी निर्वाचनका सम्भावित राजनीतिक समीकरण र स्थानीय मुद्दाबारे विचार आदान–प्रदान गर्ने अवसरसमेत बनेको बताइएको छ।
सम्बन्धित खबर
