फेडो बाँकेको ५ वर्षे रणनीतिक योजनामाथि सल्लाहकारसँग छलफल संस्थाको दिगोपन र प्रभावकारिता बढाउने उद्देश्यले भावी कार्ययोजनाबारे राय–परामर्श
एसीपी संवाददाता
२१ आश्विन २०८३, बुधबार ०१:४० मा प्रकाशित
दिनेश ठाकुर, नेपालगन्ज, असोज १९ — दलित महिला संघ (फेडो) बाँकेको १९औँ साधारणसभा तथा सामाजिक परीक्षण कार्यक्रमको तयारी बैठक सम्पन्न भएको छ। तयारी बैठकपछि संस्थाको आगामी दिशा, दिगोपन तथा प्रभावकारिता अभिवृद्धि गर्ने उद्देश्यले ५ वर्षे रणनीतिक योजना र भावी कार्ययोजनाका विषयमा सल्लाहकारहरूसँग महत्वपूर्ण छलफल गरिएको छ।
छलफलका क्रममा फेडो बाँकेको आगामी पाँच वर्षको कार्यदिशा, संस्थागत विकास, कार्यक्रमको प्रभावकारिता तथा दलित तथा सीमान्तकृत महिलाको हकअधिकार र सशक्तीकरणका क्षेत्रमा थप प्रभावकारी रूपमा अघि बढ्ने विषयमा सल्लाहकारहरूसँग राय–परामर्श गरिएको थियो।
फेडो बाँकेकी अध्यक्ष निर्मला सुनारले संस्थालाई आगामी दिनमा थप व्यवस्थित, प्रभावकारी र दिगो बनाउने उद्देश्यले सल्लाहकारहरूको सुझावलाई महत्व दिइएको बताउनुभयो।
उहाँले भन्नुभयो, “संस्थाको आगामी कार्यदिशा स्पष्ट र प्रभावकारी बनाउन सल्लाहकारहरूको अनुभव तथा सुझाव महत्वपूर्ण हुन्छ। पाँच वर्षे रणनीतिक योजनालाई व्यवहारिक र परिणाममुखी बनाउँदै संस्थालाई अझ सशक्त रूपमा अघि बढाउने हाम्रो उद्देश्य हो।”
त्यसैगरी, फेडो बाँकेकी कार्यक्रम संयोजक दिलशा गौतमले संस्थाको उन्नति र आगामी रणनीतिक योजनाका लागि समय दिएर महत्वपूर्ण सुझाव प्रदान गर्ने सम्पूर्ण सल्लाहकारहरूप्रति आभार व्यक्त गर्नुभयो।
उहाँले भन्नुभयो, “संस्थाको आगामी यात्रा अझ प्रभावकारी बनाउन प्राप्त सुझाव र राय–परामर्शले महत्वपूर्ण सहयोग पुर्याउने विश्वास लिएका छौँ। यसका लागि सम्पूर्ण सल्लाहकारहरूप्रति हार्दिक धन्यवाद व्यक्त गर्दछौँ।”
स्थापनाकालदेखि नै दलित तथा सीमान्तकृत महिलाको हकअधिकार, नेतृत्व विकास र सशक्तीकरणका क्षेत्रमा क्रियाशील फेडो बाँकेले आगामी दिनमा संस्थागत क्षमता अभिवृद्धि गर्दै आफ्ना कार्यक्रमलाई थप प्रभावकारी बनाउने लक्ष्य लिएको जनाएको छ।
१९औँ साधारणसभा तथा सामाजिक परीक्षण कार्यक्रमलाई व्यवस्थित र उपलब्धिमूलक रूपमा सम्पन्न गर्ने तयारीसँगै गरिएको रणनीतिक छलफलले संस्थाको आगामी पाँच वर्षको कार्यदिशा तय गर्न महत्वपूर्ण आधार तयार गर्ने अपेक्षा गरिएको छ।
सम्बन्धित खबर
