चाइना डेभलपमेन्ट बैंक (सीडीबी) का पूर्वअध्यक्ष भ्रष्टाचारमा सम्लग्न , अनुसन्धान शुरु
एसीपी संवाददाता
३ श्रावण २०८३, आईतवार ११:१३ मा प्रकाशित
चीनको सबैभन्दा ठूलो नीतिगत वित्तीय संस्थामध्ये एक चाइना डेभलपमेन्ट बैंक (सीडीबी) का पूर्वअध्यक्ष ओयाङ वेइमिन माथि गम्भीर अनुशासनहीनता र कानुनी उल्लङ्घनको आशंकामा अनुसन्धान सुरु गरिएको छ। यससँगै चीनले वित्तीय क्षेत्रमा सञ्चालन गरिरहेको व्यापक भ्रष्टाचारविरुद्धको अभियानले थप गति लिएको छ।
चीनको शीर्ष भ्रष्टाचार नियन्त्रण निकाय केन्द्रीय अनुशासन निरीक्षण आयोग (सीसीडीआई) ले आइतबार जारी गरेको विज्ञप्तिमा ओयाङमाथि गम्भीर अनुशासन र कानुनी उल्लङ्घनको आशंकामा अनुसन्धान भइरहेको जनाएको हो। यद्यपि आयोगले उनीमाथि लगाइएका आरोपको प्रकृति वा घटनाको समयबारे विस्तृत विवरण सार्वजनिक गरेको छैन।
चीनमा ‘गम्भीर अनुशासन तथा कानुनी उल्लङ्घन’ भन्ने शब्दावली सामान्यतया भ्रष्टाचार, घुसखोरी, पदको दुरुपयोग वा अन्य आर्थिक अनियमितताको प्रारम्भिक अनुसन्धानका लागि प्रयोग गरिन्छ। यस्ता अनुसन्धानपछि दोष प्रमाणित भएमा सम्बन्धित अधिकारीविरुद्ध आपराधिक मुद्दा चलाइने प्रचलन छ।
ओयाङमाथिको अनुसन्धान चीनको बैंकिङ तथा वित्तीय क्षेत्रमा पछिल्ला वर्षहरूमा भइरहेको उच्च तहका अधिकारीमाथिको कारबाहीको निरन्तरता हो। राष्ट्रपति सी चिनफिङको नेतृत्वमा चीनले राज्य स्वामित्वका बैंक, वित्तीय संस्था र सार्वजनिक निकायमा भ्रष्टाचार नियन्त्रणलाई प्राथमिकतामा राख्दै व्यापक अनुसन्धान अभियान सञ्चालन गर्दै आएको छ।
चाइना डेभलपमेन्ट बैंक चीनको महत्वपूर्ण नीतिगत बैंक हो, जसले पूर्वाधार निर्माण, औद्योगिक विकास, रणनीतिक राष्ट्रिय परियोजना तथा चीनको ‘बेल्ट एन्ड रोड इनिसिएटिभ’ अन्तर्गतका अन्तर्राष्ट्रिय परियोजनामा ठूलो परिमाणमा लगानी तथा वित्तीय सहयोग उपलब्ध गराउँदै आएको छ।
यसअघि सन् २०२४ मा पनि बैंकका एक पूर्वउपाध्यक्षलाई घुस लिएको अभियोगमा दोषी ठहर गर्दै १२ वर्षको जेल सजाय र जरिवाना सुनाइएको थियो। पछिल्लो अनुसन्धानले चीनको वित्तीय क्षेत्रमा भ्रष्टाचारविरुद्धको निगरानी अझ कडा बनाइएको संकेत दिएको विश्लेषकहरूले बताएका छन्।
सीसीडीआईले ओयाङ वेइमिनमाथिको अनुसन्धान जारी रहेको जनाउँदै आवश्यक तथ्य सार्वजनिक हुँदै जाने जनाएको छ।
सम्बन्धित खबर
तीन वटा सवारीसाधन एकापसमा ठोक्किँदा ८ जना घाइते
९ घण्टा अगाडि
इरानको आन्तरिक राजनीतिमा तीव्र सत्ता संघर्ष सुरु
१ दिन अगाडि
