डुडुवा गाउँपालिकाका स्वास्थ्यकर्मीहरूका लागि शीघ्र कुपोषणको एकिकृत ब्यबस्थापन सम्बन्धी तीनदिने क्षमता अभिवृद्धि तालिम सम्पन्न.
एसीपी संवाददाता
२४ श्रावण २०८३, आईतवार १०:५० मा प्रकाशित
डुडुवा गाउँपालिकाका स्वास्थ्यकर्मीहरूका लागि शीघ्र कुपोषणको एकिकृत ब्यबस्थापन सम्बन्धी तीनदिने क्षमता अभिवृद्धि तालिम सम्पन्न भएको छ ।
Nutrition for Life (N4L) Project अन्तर्गत बाँके युनेस्को क्लब (BUC) को प्राविधिक सहयोग, Helen Keller International (HKI) Nepal को आर्थिक सहयोग तथा स्वास्थ्य कार्यालय, बाँके को आयोजनामा डुडुवा गाउँपालिकाका स्वास्थ्यकर्मीहरूका लागि कुपोषणको एकीकृत व्यवस्थापन (Integrated Management of Acute Malnutrition – IMAM) सम्बन्धी तीनदिने क्षमता अभिवृद्धि तालिम दुई चरणमा सफलतापूर्वक सम्पन्न भएको छ।
पहिलो समूहको तालिम २०८३ साउन १९–२१ (३–५ अगस्ट २०२६) तथा दोस्रो समूहको तालिम २०८३ साउन २२–२४ (६–८ अगस्ट २०२६) सम्म बाँकेको कारकाँदोस्थित होटल इन्द्रेणी मा सञ्चालन गरिएको थियो। तालिममा डुडुवा गाउँपालिकाका वडा नं. १ देखि ६ सम्मका गरी जम्मा ५९ जना स्वास्थ्यकर्मीहरूको सक्रिय सहभागिता रहेको थियो।
तालिमको मुख्य उद्देश्य स्वास्थ्यकर्मीहरूको ज्ञान, सीप तथा प्राविधिक क्षमता अभिवृद्धि गर्दै कुपोषणको पहिचान, परीक्षण, उपचार, परामर्श, अभिलेखीकरण तथा प्रतिवेदन प्रणालीलाई प्रभावकारी बनाउनु र समुदाय तथा स्वास्थ्य संस्थास्तरमा गुणस्तरीय पोषण सेवा प्रवाह सुनिश्चित गर्नु रहेको थियो।
तालिमको उद्घाटन समारोहको अध्यक्षता स्वास्थ्य कार्यालय, बाँकेका प्रमुख श्रीमती सुनिता पौडेलले गर्नुभएको थियो भने स्वास्थ्य कार्यालय, बाँकेकी पोषण फोकल पर्सन श्रीमती बसन्ती मल्लले तालिमको औपचारिक उद्घाटन गर्नुभएको थियो। उद्घाटन मन्तव्यका क्रममा श्रीमती मल्लले तालिमका उद्देश्य तथा अपेक्षित उपलब्धिबारे प्रकाश पार्दै कुपोषणका समस्याको गहिरो विश्लेषण, तथ्यमा आधारित समाधान र उपयुक्त रणनीतिक कार्यान्वयनमार्फत मात्र अपेक्षित परिणाम हासिल गर्न सकिनेमा जोड दिनुभयो।
तालिमका सम्पूर्ण सत्रहरू अद्यावधिक IMAM निर्देशिका तथा वर्तमान मापदण्ड र प्रोटोकलअनुरूप सञ्चालन गरिएको थियो। सहभागीहरूको सक्रिय सहभागिता र व्यावहारिक सिकाइलाई प्राथमिकता दिँदै प्राविधिक प्रस्तुति, समूहगत छलफल, अनुभव आदानप्रदान, व्यावहारिक अभ्यास तथा प्रदर्शनात्मक विधिहरू प्रयोग गरिएको थियो।
तालिममा ६ महिनाभन्दा कम उमेरका बालबालिका तथा ६–५९ महिनासम्मका बालबालिकामा कुपोषण व्यवस्थापन, OTC मार्फत उपचार तथा व्यवस्थापन, एन्थ्रोपोमेट्रिक मापन, ट्रायेज प्रक्रिया, Appetite Test, परामर्श, RUTF तथा Super Cereal Plus को प्रयोग तथा सेवन विधि, कुपोषण उपचारमा प्रयोग हुने Therapeutic Food को व्यवस्थापन तथा आपूर्ति प्रणालीलगायतका महत्वपूर्ण विषयमा सैद्धान्तिक तथा व्यावहारिक सत्रहरू सञ्चालन गरिएको थियो।
स्वास्थ्य कार्यालय, बाँकेकी प्रमुख श्रीमती सुनिता पौडेलले नेपालमा कुपोषणको वर्तमान अवस्था तथा विशेषगरी बाँके जिल्लाको अवस्थाबारे जानकारी गराउँदै Therapeutic Food को प्रयोग, उपचार तथा यसको प्रभावकारी व्यवस्थापन र आपूर्ति प्रणालीबारे समेत जानकारी प्रदान गर्नुभयो।
तालिमका प्रमुख सत्रहरू HKI का Field Officer श्री लीलबहादुर नेपाली र बाँके युनेस्को की Program Coordinator श्री दृष्टि शाहले सहजीकरण गर्नुभएको थियो भने स्वास्थ्य कार्यालय, बाँकेका प्रमुख श्री सुनिता पौडेल तथा पोषण फोकल पर्सन श्री बसन्ती मल्लबाट समेत आवश्यक प्राविधिक सहयोग तथा मार्गदर्शन प्राप्त भएको थियो।
तालिमले स्वास्थ्यकर्मीहरूको प्राविधिक क्षमता मात्र अभिवृद्धि नगरी कुपोषण व्यवस्थापनमा संलग्न सरोकारवालाबीच समन्वय, सहकार्य र साझा उत्तरदायित्वको भावना पनि थप सुदृढ गरेको छ। यसबाट डुडुवा गाउँपालिकाका सम्बन्धित वडा तथा समुदायमा कुपोषणका केसहरूको समयमै पहिचान, उपचार, रेफरल, परामर्श तथा फलोअपलाई थप प्रभावकारी बनाउन योगदान पुग्ने अपेक्षा गरिएको छ।
समापन समारोहमा स्वास्थ्य कार्यालय, बाँकेकी प्रमुख श्री सुनिता पौडेलले तालिमबाट प्राप्त ज्ञान, सीप र अनुभवलाई आ–आफ्नो कार्यक्षेत्रमा व्यवहारमा उतार्न सम्पूर्ण स्वास्थ्यकर्मीहरूलाई आग्रह गर्नुभयो। उहाँले समुदायबाट कुपोषणको समस्या न्यूनीकरण गर्दै अन्ततः यसको अन्त्य गर्ने साझा लक्ष्य हासिल गर्न स्वास्थ्य कार्यालयबाट आवश्यक सहयोग र सहकार्य निरन्तर रहने प्रतिबद्धता समेत व्यक्त गर्नुभयो।
तालिमको समग्र व्यवस्थापन तथा सहजीकरण Nutrition for Life Project का Program Coordinator श्री दृष्टि शाह र MEAL Officer श्री अनु चौधरीको समन्वयमा गरिएको थियो।
आज स्वास्थ्यकर्मीको क्षमता अभिवृद्धिमा गरिएको लगानी नै भोलिको स्वस्थ र समृद्ध समुदाय निर्माणको आधार हो। ज्ञान, सीप, समन्वय, प्रमाणमा आधारित अभ्यास र निरन्तर प्रतिबद्धताका साथ अघि बढ्दै हामी प्रत्येक बालबालिकाले आवश्यक पोषण, स्वास्थ्य सेवा र उचित हेरचाह प्राप्त गर्ने वातावरण निर्माण गर्न सक्छौँ।
“सक्षम स्वास्थ्यकर्मी, स्वस्थ बालबालिका र पोषणयुक्त समुदाय—हाम्रो साझा प्रतिबद्धता।”
सम्बन्धित खबर
