प्रथम मेयर कप अन्तर विद्यालय पौडी प्रतियोगिता सम्पन्न
एसीपी संवाददाता
२९ जेष्ठ २०८३, शुक्रबार १६:२९ मा प्रकाशित
नेपालगन्ज, जेष्ठ २९ – पूर्व खेलाडी समाज बाँकेको आयोजना तथा नेपालगन्ज उपमहानगरपालिकाको सहयोगमा आयोजित प्रथम मेयर कप अन्तर विद्यालय पौडी प्रतियोगिता २०८३ शुक्रबार नेपालगन्ज रंगशाला परिसरभित्र रहेको पौडी पोखरीमा सम्पन्न भएको छ।
प्रतियोगितामा नेपालगन्जका १४ वटा विद्यालयका ८२ जना छात्र–छात्राको सहभागिता रहेको थियो। विभिन्न उमेर समूहका छात्र तथा छात्राहरूबीच फ्रिस्टाइल, ब्याकस्ट्रोक, ब्रेस्टस्ट्रोक र बटरफ्लाई विधामा प्रतिस्पर्धा गरिएको थियो।
कार्यक्रमका प्रमुख अतिथि नेपालगन्ज उपमहानगरपालिकाका प्रमुख प्रशान्त बिष्ट रहेका थिए। प्रतियोगिताको सञ्चालन पूर्व खेलाडी समाज बाँकेका सचिव नरेन्द्र थापाले गरेका थिए।
प्रतियोगितामा उत्कृष्ट प्रदर्शन गर्दै शिखा एकेडेमीका सुशान्त बोहरा उत्कृष्ट छात्र घोषित भए। उनले नगद रु. ५,५०० सहित सम्मान प्राप्त गरे। त्यस्तै स्प्रिङ्डेल एकेडेमीकी नित्याश्री दहित उत्कृष्ट छात्रा घोषित भई नगद रु. ५,५०० सहित सम्मानित भइन्।
विद्यालयगत समग्र अंकतर्फ शिखा एकेडेमी १२३ अंकका साथ प्रथम, सोफिया रेसिडेन्सियल स्कूल २२ अंकका साथ द्वितीय तथा स्प्रिङ्डेल एकेडेमी १४ अंकका साथ तृतीय स्थान हासिल गर्न सफल भए।
प्रतियोगितामा विभिन्न विधामा उत्कृष्ट प्रदर्शन गर्ने खेलाडीहरूलाई प्रमुख अतिथि, विशिष्ट अतिथि, अतिथि तथा आयोजक संस्थाका पदाधिकारीहरूले पदक, ट्रफी, प्रमाणपत्र तथा पुरस्कार वितरण गरेका थिए।
कार्यक्रमलाई सम्बोधन गर्दै प्रमुख अतिथि प्रशान्त बिष्टले पौडी खेल स्वास्थ्य, अनुशासन र जीवनरक्षासँग प्रत्यक्ष सम्बन्धित खेल भएको उल्लेख गर्दै विद्यालयस्तरबाट खेलकुद गतिविधिलाई प्राथमिकता दिनुपर्ने बताए। उनले यस्ता प्रतियोगिताले बालबालिकाको प्रतिभा पहिचान गर्न तथा राष्ट्रिय स्तरका खेलाडी उत्पादन गर्न महत्वपूर्ण भूमिका खेल्ने विश्वास व्यक्त गरे। आगामी दिनमा नेपालगन्ज उपमहानगरपालिकाले खेलकुद विकासका कार्यक्रमलाई निरन्तर सहयोग गर्ने प्रतिबद्धता समेत जनाए।
कार्यक्रमका अध्यक्ष तथा पूर्व खेलाडी समाज बाँकेका अध्यक्ष प्रकाश बहादुर श्रेष्ठले समाजले पूर्व खेलाडीहरूको अनुभवलाई नयाँ पुस्तासम्म पुर्याउने उद्देश्यले विभिन्न खेलकुद कार्यक्रम सञ्चालन गर्दै आएको बताए। उनले प्रतियोगितामा विद्यालयहरूको उत्साहजनक सहभागिता देखिएको भन्दै आगामी वर्षहरूमा प्रतियोगितालाई अझ व्यापक र व्यवस्थित बनाइने जानकारी दिए।
समाजका सल्लाहकार अजित कुमार शर्माले पौडी खेलको महत्वबारे चर्चा गर्दै बाँके जिल्लामा जलक्रीडाको सम्भावना उच्च रहेको बताए। उनले विद्यालयस्तरमै खेलाडी उत्पादन गर्न सके प्रदेश तथा राष्ट्रिय स्तरमा बाँकेको प्रतिनिधित्व अझ सशक्त बन्ने धारणा व्यक्त गरे।
आयोजकका अनुसार प्रतियोगिताले विद्यालयस्तरमा पौडी खेलप्रति आकर्षण बढाउनुका साथै नयाँ प्रतिभा पहिचान गर्न महत्वपूर्ण योगदान पुर्याएको छ। प्रतियोगिता सफलतापूर्वक सम्पन्न गर्न सहयोग गर्ने नेपालगन्ज उपमहानगरपालिका, सहभागी विद्यालय, प्रशिक्षक, अभिभावक तथा स्वयंसेवकप्रति आयोजकले धन्यवाद ज्ञापन गरेको छ।
खेलाडीगत पदक विवरण
आध्यान भण्डारी (शिखा एकेडेमी) – १ स्वर्ण, १ रजत र १ काँस्य
सुमिंक वाग्ले (शिखा एकेडेमी) – ३ स्वर्ण, १ रजत
काफिया चलाउने (शिखा एकेडेमी) – २ स्वर्ण
अर्पित राना (शिखा एकेडेमी) – २ स्वर्ण, १ काँस्य
सुशान्त बोहरा ( शिखा एकेडेमी )- ४ स्वर्ण
युवान श्रेष्ठ (शिखा एकेडेमी) – १ स्वर्ण, २ रजत, १ कांस्य
निर्देश बोहरा (शिखा एकेडेमी) – १ स्वर्ण , २ रजत, १ कांस्य
प्रत्युष जोशी (जीवन ज्योति) – २ रजत, २ कांस्य
इभान्सु भट्टराई (शिखा एकेडेमी) – २ कांस्य, २ रजत
सम्यक गैरे (सोफिया रेसिडेन्सियल) – २ रजत, २ कांस्य
दृष्टि बुढा मगर (सोफिया रेसिडेन्सियल) – १ स्वर्ण ,१ रजत
कृतिका वाग्ले (शिखा एकेडेमी ) – १ रजत, २ काँस्य
ईभा भट्टराई (शिखा एकेडेमी) –१ स्वर्ण, २ रजत
अनोरा चौधरी (बाल्मिकी इन्टरनेशनल) – १ स्वर्ण, १ रजत, १ कांस्य
श्रीया बोहरा (सोफिया रेसिडेन्सियल) – १ रजत
केरिशा बुढाथोकी (सनबिम) – १ कांस्य
केशव बीके (सनबिम) – १ स्वर्ण
दीप श्रेष्ठ (आर्मी) – १ रजत
रेश्मन चौधरी (एनपी मोडल) – १ कांस्य
बसन्त थारु (एनपी मोडल) – १ स्वर्ण
ललित गिरी (बाल विद्या सेकेन्डरी) – १ रजत
आयुष सिंह ठकुरी (एनपी मोडल) – १ कांस्य
जिज्ञासा भुषाल (वेस्ट जोन) – १ स्वर्ण
सम्स्थिता गिरी (मोडर्न पब्लिक) – १ रजत
श्रेयलशी सिंह (मोडर्न पब्लिक) – १ कांस्य
आज्ञा थापा ( जे एस सेकण्डरी)- १ स्वर्ण, १ रजत
बिधेयंक खनाल ( सोफिया रेसिडेन्सियल) १ काँस्य
समिरा रास्कोटी ( बागेश्वरी एकेडेमी )- २ काँस्य
सम्बन्धित खबर
