फर्किएका विद्यार्थीहरूलाई सरकारी प्रोटोकल र क्रेडिट ट्रान्सफरको पालना गर्दै भर्ना दिने घोषणा
एसीपी संवाददाता
१० फाल्गुन २०८१, शनिबार १८:३३ मा प्रकाशित
नुर मोहम्मद अन्सारी
काठमाडौँ, फागुन १०, २०८१: हालैको KIIT घटनापछि, पूर्वाञ्चल विश्वविद्यालयले विदेशमा अध्ययन अधुरो राखेर फर्किएका विद्यार्थीहरूलाई सरकारी प्रोटोकल र क्रेडिट ट्रान्सफरको पालना गर्दै भर्ना दिने घोषणा गरेको छ।
यो निर्णय KIIT विश्वविद्यालयमा नेपाली विद्यार्थी प्रकृति लाम्सालको निधनपछि उत्पन्न परिस्थितिलाई मध्यनजर गर्दै गरिएको हो। उक्त घटनापछि, धेरै नेपाली विद्यार्थीहरू आफ्नो अध्ययन अधुरो राखेर स्वदेश फर्किएका थिए। पूर्वाञ्चल विश्वविद्यालयले ती विद्यार्थीहरूको शैक्षिक भविष्यलाई सुनिश्चित गर्न यो कदम चालेको हो।
विश्वविद्यालयका उपकुलपति डा. रमेशप्रसाद सिंहले भने, “हामीले विदेशबाट फर्किएका विद्यार्थीहरूको अध्ययनलाई निरन्तरता दिन आवश्यक व्यवस्था गरेका छौं। सरकारी मापदण्ड र क्रेडिट ट्रान्सफर प्रक्रियाको पालना गर्दै उनीहरूलाई भर्ना दिनेछौं।”
यसअघि, KIIT विश्वविद्यालयले नेपाली विद्यार्थीहरूलाई होस्टल खाली गर्न आदेश दिएको थियो, जसले गर्दा धेरै विद्यार्थीहरू समस्यामा परेका थिए। तर, नेपाल सरकार र कूटनीतिक प्रयासहरूपछि, KIIT ले आफ्नो निर्णय फिर्ता लिँदै नेपाली विद्यार्थीहरूलाई पुनः भर्ना गर्ने घोषणा गरेको थियो।
पूर्वाञ्चल विश्वविद्यालयको यो निर्णयले विदेशमा अध्ययनरत नेपाली विद्यार्थीहरूलाई स्वदेशमै अध्ययन जारी राख्न सहयोग पुर्याउने विश्वास गरिएको छ।
सम्बन्धित खबर
