राजापुरमा मानव बेचबिखन तथा सीमापार संरक्षणसम्बन्धी दुईदिने तालिम सम्पन्न
एसीपी संवाददाता
६ आश्विन २०८३, मंगलवार २०:३५ मा प्रकाशित
राजापुर, बर्दिया, असोज ६ — मानव बेचबिखन, लागुऔषध दुव्र्यसन रोकथाम तथा सीमापार समन्वय संयन्त्रसम्बन्धी अधिकारकर्मी तथा सीमावर्ती क्षेत्रमा कार्यरत सरोकारवालाका लागि आयोजित दुईदिने क्षमता अभिवृद्धि तालिम बर्दियाको राजापुरमा सम्पन्न भएको छ ।
बाँके युनेस्को क्लबको आयोजना, प्लान इन्टरनेसनल नेपालको साझेदारी तथा राजापुर नगरपालिकासँगको समन्वयमा सुरक्षा परियोजनाअन्तर्गत तालिम सञ्चालन गरिएको हो ।
सीमावर्ती क्षेत्रमा हुने मानव बेचबिखन, लागुऔषध दुव्र्यसन तथा सीमापार आवतजावतका क्रममा उत्पन्न हुने जोखिमलगायत संरक्षणसम्बन्धी समस्यालाई प्रभावकारी रूपमा सम्बोधन गर्न स्थानीय सरोकारवालाको ज्ञान, सीप, समन्वय र सामूहिक क्षमता अभिवृद्धि गर्ने उद्देश्यले तालिम आयोजना गरिएको आयोजकले जनाएको छ ।
तालिमको उद्घाटन सत्रको अध्यक्षता राजापुर नगरपालिकाका उपप्रमुख मनकला कुमारी चौधरीले गर्नुभएको थियो । कार्यक्रममा राजापुर नगरपालिकाका वडा नं. १ देखि १० सम्मका वडाध्यक्ष तथा वडा सदस्य, वडा सचिव, इलाका प्रहरी कार्यालय तथा सशस्त्र प्रहरी बलका प्रतिनिधि, रोजगार तथा स्वास्थ्य शाखाका प्रतिनिधिलगायत विभिन्न सरोकारवालाको सहभागिता रहेको थियो ।
तालिममा स्थानीय तहका जनप्रतिनिधि, सुरक्षाकर्मी तथा समुदायस्तरका प्रतिनिधिको सहभागिताले मानव बेचबिखन, लागुऔषध दुव्र्यसन तथा सीमापार संरक्षणका सवालमा साझा बुझाइ, समन्वय र सामूहिक जिम्मेवारी सुदृढ गर्न महत्वपूर्ण आधार तयार भएको बताइएको छ ।
दुई दिनसम्म सञ्चालन भएको तालिममा मानव बेचबिखन तथा यसको रोकथाम, लागुऔषध दुव्र्यसनबाट उत्पन्न हुने जोखिम, सीमापार संरक्षणका सवाल, जोखिममा रहेका व्यक्तिको पहिचान, सूचना आदानप्रदान, आवश्यक सहयोगका लागि सम्बन्धित निकायमा पठाउने प्रक्रिया, प्रतिक्रिया दिने संयन्त्र तथा विभिन्न सरोकारवालाको भूमिका र जिम्मेवारीका विषयमा छलफल गरिएको थियो ।
तालिमको सहजीकरण बिनय दिल लामाले गर्नुभएको थियो भने स्थलगत व्यवस्थापन तथा समन्वयको जिम्मेवारी क्षेत्रीय पर्यवेक्षक परमिशा थारुले सम्हाल्नुभएको थियो ।
तालिमको समापन राजापुर नगरपालिकाका नगर प्रमुख दिपेश थारुको अध्यक्षतामा भएको थियो । समापन कार्यक्रममा नगरपालिकाका प्रशासन शाखा प्रमुखलगायतको उपस्थिति रहेको थियो ।
समापन सत्रमा तालिमबाट प्राप्त प्रमुख सिकाइ तथा अनुभवको समीक्षा गर्दै हासिल भएका ज्ञान र सीपलाई व्यवहारमा लागू गर्नुपर्नेमा जोड दिइएको थियो । मानव बेचबिखन, लागुऔषध दुव्र्यसन तथा सीमापारबाट उत्पन्न हुन सक्ने संरक्षणसम्बन्धी जोखिम न्यूनीकरणका लागि समुदाय तथा संस्थागत तहमा निरन्तर, समन्वयात्मक र प्रभावकारी रूपमा काम गर्नुपर्नेमा सहभागीहरूले जोड दिएका थिए ।
तालिमले मानव बेचबिखन तथा लागुऔषध दुव्र्यसनको रोकथाम र जोखिममा रहेका व्यक्तिको संरक्षण सबैको साझा जिम्मेवारी भएको सन्देशलाई थप बलियो बनाएको छ ।
स्थानीय तहमा उपलब्ध क्षमता, साझेदारी र समन्वय संयन्त्रलाई थप सुदृढ गर्दै सबै सरोकारवाला एकजुट भएर काम गर्न सके जोखिममा रहेका व्यक्तिलाई समयमै सूचना, सुरक्षा तथा आवश्यक सहयोग उपलब्ध गराउन सकिनेमा सहभागीहरूले जोड दिएका छन् ।
सम्बन्धित खबर
