राष्ट्रिय एकता तथा मेलमिलाप दिवसको अवसरमा पदयात्रा सुरु – केसी
एसीपी संवाददाता
२ माघ २०८१, बुधबार १६:१६ मा प्रकाशित
(दुरसञ्चार ) : प्रस्तावित ‘विपी राजमार्ग’ अर्थात खड्कवार–घुइँयाबारी मार्गमा नेपाली कांग्रेसले पदयात्रा सुरु गरेको छ । नेपाली काँग्रेस क्षेत्र नम्बर १ बाँकेले आजबाट पदयात्रा सुरु गरेको हो ।
कोहलपुर नगरपालिकाको खड्कवारदेखी सल्यानको कालिमाटी गाउँपालिका अन्तरगत पर्ने घुइँयावारी सम्मका लागि पदयात्रा सुरु गरिएको कांग्रेस क्षेत्र नम्बर १ बाँकेका सभापति पोषणराज केसीले जानकारी दिए । राष्ट्रिय एकता तथा मेलमिलाप दिवसको अवसरमा उक्त पदयात्रा सुरु गरिएको उनले बताए ।
सभापति केसीका अनुसार उक्त मार्गको प्रथम जननिर्वाचित प्रधानमन्त्री स्वर्गिय विपी कोइरालाले बजेट सुनिश्चित गर्दै शिलान्यास गर्ने तयारी गरेका थिए । तर, तत्कालिन राजा महेन्द्रले २०१७ साल पुस १ गतेका दिन ‘कु’ गरेपछि सडक निर्माणको काम अलपत्र परेको थियो । स्थानीय बासिन्दाका अनुसार सल्यान–कोहलपुर आवत जावत गर्नका लागि यो सडक अत्यन्तै छोटो दुरीमा पर्दछ ।
स्वर्गिय कोइरालाको परिकल्पना र स्थानीय बासिन्दालाई आवश्यकता समेत रहेको उक्त सडक निर्माण कार्यमा सरकारलाई दवाव दिने उद्धेश्यले पदयात्रा गरिएको केसीले बताए ।
पदयात्रामा नेपाली कांग्रेसका केन्द्रीय सदस्य कृष्ण किशोर घिमिरे, जिल्ला सभापति नारायणप्रसाद गौडेल, लुम्बिनी प्रदेश सदस्य टेकनारायण भुसाल, जिल्ला सचीव सुधान्सु कोइराला, पर्यटनकर्मी श्रीराम सिग्देल कांग्रेस क्षेत्र नम्बर १ का पदाधिकारी लगायत ३५ जना सहभागी भएको सभापति केसीले जानकारी दिए ।
सम्बन्धित खबर
