श्रीलङ्काको मिडिया स्वतन्त्रतामा चिनियाँ हस्तक्षेपको आशंका
एसीपी संवाददाता
८ माघ २०८१, मंगलवार ०७:५० मा प्रकाशित
श्रीलङ्काका पत्रकार समूहहरूले राष्ट्रपति अनुरा कुमारा दिसानायकेको बेइजिङ भ्रमणका क्रममा चिनियाँ मिडिया संस्थाहरूसँग गरिएका समझदारीहरूप्रति गम्भीर चिन्ता व्यक्त गरेका छन्।
श्रीलङ्का वर्किङ जर्नलिस्ट्स एशोसिएसनका अध्यक्ष दुमिन्दा सम्पथले यो कदमलाई आलोचना गर्दै भने, “चिनियाँ मिडिया प्रायः राज्य नियन्त्रित हुन्छन्। श्रीलङ्काका पत्रकारहरू मिडिया स्वतन्त्रता सुनिश्चित गर्न सुधारको पक्षमा वकालत गरिरहेको समयमा यस्तो निर्णय गम्भीर रूपमा चिन्ताजनक छ।”
सम्पथले यस प्रकारका सम्झौताहरूले श्रीलङ्काको मिडिया परिदृश्यमा विदेशी प्रभाव बढाउने खतरा औंल्याएका छन्। साथै, सरकारले मिडिया समुदायसँग परामर्श नगरी यो निर्णय गरेको भन्दै पारदर्शिताको अभावलाई प्रेस स्वतन्त्रताका लागि खतरा भएको बताए।
फ्री मिडिया मुभमेन्टका लसन्था डि सिल्भाले पनि यी चिन्ताहरूको समर्थन गर्दै सरकारलाई सम्झौताहरूको विवरण सार्वजनिक गर्न माग गरे। “हामी लामो समयदेखि मिडियाले सामाजिक जिम्मेवारीका साथ काम गर्नुपर्ने माग गर्दै आएका छौँ। यी सम्झौताहरूले देशमा कस्तो प्रभाव पार्छ भन्ने कुरा जनतालाई थाहा हुन आवश्यक छ,” उनले भने।
सरकारले चीनको नेशनल रेडियो र टेलिभिजन एडमिनिस्ट्रेसन (NRTA) र राज्य-नियन्त्रित सिन्ह्वा न्यूज एजेन्सीसँग सम्झौताहरू गर्ने तयारी गरेको छ। यस अन्तर्गत, श्रीलङ्का रुपवाहिनी कर्पोरेशन, श्रीलङ्का ब्रडकास्टिङ कर्पोरेशन, र लेक हाउसजस्ता संस्थाहरू चिनियाँ मिडिया समूहहरूसँग सहकार्यमा लाग्नेछन्।
पत्रकार समूहहरूले सरकारले मिडिया स्वतन्त्रतालाई प्राथमिकतामा राखेर निर्णय लिनुपर्ने र विदेशी हस्तक्षेप रोक्न पारदर्शी प्रक्रिया अपनाउनुपर्ने माग गरेका छन्। नेपालआज
सम्बन्धित खबर
