बोधिवृक्षको दर्शनदेखि सुरक्षा सहकार्यसम्म : मोदीको श्रीलङ्का भ्रमणले भारत-श्रीलङ्का सम्बन्धमा नयाँ गति थप्यो
एसीपी संवाददाता
२४ चैत्र २०८१, सोमबार ०५:२४ मा प्रकाशित
कोलम्बो । भारतका प्रधानमन्त्री नरेन्द्र मोदीको दुईदिने श्रीलङ्का भ्रमणले धार्मिक आस्थादेखि सुरक्षा रणनीतिसम्मको बहुआयामिक सम्बन्धलाई मजबुत बनाएको संकेत दिएको छ।
प्रधानमन्त्री मोदीले आइतबार श्रीलङ्काको अनुराधापुरास्थित ऐतिहासिक श्री महाबोधि वृक्षको दर्शन गर्दै बौद्ध धर्मप्रति श्रद्धा प्रकट गरे। भारतको बोधगयामा बुद्धले बुद्धत्व प्राप्त गरेको अञ्जीरको बोटको सन्तान मानिने यो पवित्र वृक्षलाई श्रीलङ्कामा विशेष सम्मान र सुरक्षा दिइन्छ। फूल चढाएर मोदीले धार्मिक आस्थाको सम्मान मात्र होइन, सांस्कृतिक सम्बन्धको पुनः पुष्टि पनि गरेका छन्।
यो भ्रमणले दुई देशबीचको गहिरो सांस्कृतिक, आध्यात्मिक र सभ्यतागत सम्बन्धलाई पुनः पुष्टि गरेको छ, प्रधानमन्त्री मोदीले भारत फर्किनुअघि सामाजिक सञ्जालमार्फत उल्लेख गरे।
बौद्ध बाहुल्य देश श्रीलङ्कामा भारतीय प्रधानमन्त्रीको यस्तो आस्था प्रदर्शनले दुई मुलुकबीचको ऐतिहासिक सम्बन्धलाई भावनात्मक धरातलमा झनै बलियो बनाएको देखिएको छ।
तर, मोदीको यो भ्रमण केवल सांस्कृतिक सीमित थिएन। शनिबार भारतीय प्रधानमन्त्री मोदी र श्रीलङ्काका राष्ट्रपति अनुरा कुमारा दिसानायकेबीच रक्षा, ऊर्जा लगायत सातवटा महत्त्वपूर्ण समझौतामा हस्ताक्षर भयो।
दिसानायकेले मोदीलाई ‘श्रीलङ्काप्रति देखाइएको गहिरो व्यक्तिगत मित्रता’ को कदरस्वरूप देशको सर्वोच्च नागरिक सम्मान प्रदान गरे। यस सम्मानले भारत–श्रीलङ्का सम्बन्धलाई कूटनीतिक स्तरमा पनि नयाँ उचाइ दिएको छ।
भ्रमणका क्रममा प्रधानमन्त्री मोदीले स्पष्ट शब्दमा भने, “हाम्रो सुरक्षा हित अन्योन्याश्रित र अन्तरसम्बन्धित छन्।” उनले श्रीलङ्काको भूपरिधि कुनै तेस्रो पक्षद्वारा भारतको सुरक्षाविरुद्ध प्रयोग नहोस् भन्ने भारतको चिन्ता साझा भएको बताए।
यसैबीच, राष्ट्रपति दिसानायकेले पनि श्रीलङ्काको भूमि भारतविरुद्ध प्रयोग नहुने आश्वासन दिएको भारतीय सञ्चारमाध्यमले जनाएका छन्।
सम्बन्धित खबर
