कुटनीतिक मर्यादा विपरीत अभिव्यक्ति दिने चिनियाँ राजदूतसँग प्रधानमन्त्रीले लिए स्पष्टीकरण
एसीपी संवाददाता
२३ भाद्र २०८०, शनिबार ०८:५४ मा प्रकाशित
काठमाडौं । प्रधानमन्त्री पुष्पकमल दाहालले नेपालका लागि चिनियाँ राजदूत छेन् सोङसँग स्पष्टीकरण लिएका छन् ।
राजदूत सोङलाई शुक्रबार साँझ बालुवाटार बोलाएर प्रधानमन्त्री प्रचण्डले कुटनीतिक सीमा नाघेर नेपाल भारत सम्बन्ध र विद्युत व्यापार सम्झौताबारे दिएको नकारात्मक टिप्पणीबारे स्पष्टीकरण लिएका हुन् । प्रधानमन्त्रीको सचिवालय स्रोतकाअनुसार उक्त टिप्पणीबारे राजदूत सोङले आत्मालोचना गर्दै माफी मागेका छन् । उक्त अभिव्यक्तिका लागि राजदूत सोङलाई सचेत गराउनुपर्नेदेखि स्पष्टीकरण सोधेर फिर्ता पठाउनुपर्नेसम्म माग उठिरहेको छ ।
भेटमा प्रधानमन्त्री दाहालले चीनले हालै सार्वजनिक गरेको नयाँ नक्सामा चुच्चे नक्सा छुटाएको बारे पनि चिनियाँ राजदूतको ध्यानाकर्षण गराएका थिए । साथै आसन्न चीन भ्रमणबारे पनि छलफल भएको थियो ।
के भनेका थिए चिनियाँ राजदुत
नेपालको दक्षिण छिमेकी भारतसँगको सम्बन्धबारे नकारात्मक टिप्पणी गरेर आन्तरिक मामिलामा हस्तक्षेप गरेका चिनियाँ राजदूत छेन सोङलाई फिर्ता पठाउन सरकारमाथि दबाब बढेको छ ।
खासगरी नेपाल र भारतबीच भएको जलविद्युत व्यापारको आलोचना गरेपछि सबै दलले चिनियाँ राजदूत आफ्नो हैसियतभन्दा बाहिर गएको भन्दै सचेत गराउने, स्पष्टीकरण सोध्ने र फिर्ता पठाउनेसम्मको आवाज सडकदेखि सदनसम्म उठेको छ ।
कांग्रेस, एमाले, माओवादी केन्द्र, रास्वपा, राप्रपा, जसपा, लोसपाका सांसदले चिनियाँ राजदूतको अभिव्यक्ति आपत्तिजनक भन्दै स्पष्टीकरण लिनुपर्ने माग गरेका छन् भने सीके राउत नेतृत्वको जनमतले सदनमै आफ्नो सीमाभित्र नबस्ने राजदूतलाई फिर्ता पठाउनुपर्ने माग गरेको छ । सत्ता र प्रतिपक्षी सबै दलले राजदूतको विरोध गरेपछि सरकारले स्पष्टीकरण सोध्ने तयारी गरेको छ ।
परराष्ट्र मन्त्रालयले राजदूत सोङलाई स्पष्टीकरण सोध्ने तयारी गरेको उच्च स्रोतले जानकारी दिएको छ । देशभित्र चौतर्फी विरोध बढेपछि प्रधानमन्त्री प्रचण्डले स्पष्टीकरण सोध्न अनुमति दिएका हुन् । स्पष्टीकरण चित्त नबुझे फिर्ता पठाउनेसम्मको तयारी छ ।
