दसैंको मुखमै फेरि चिनियाँ नाकाबन्दी: तातोपानीमा रोकिए सामान बोकेका कन्टेनर
एसीपी संवाददाता
२० भाद्र २०८१, बिहीबार १२:२२ मा प्रकाशित
काठमाडौं – दसैंको रौनकता सुरु हुँदै गर्दा चीनले फेरि एक पटक नेपालतर्फका वस्तुहरूको आपूर्तिमा अवरोध पुर्याएको छ। तातोपानी र खासा बजारको बीचमा सुरुङ निर्माण भइरहेका कारण दसैं लक्षित सामग्री बोकेका चिनियाँ कन्टेनर खासा र न्यालममै रोकिएका छन्। यो नाकाबन्दीले गर्दा नेपाली व्यवसायीहरू चिन्तित छन् कि दसैंका लागि आवश्यक सामग्री र फलफूल समयमै नेपाल आइपुग्ने छैन।
तातोपानी सुक्खा बन्दरगाह तथा भन्सार कार्यालयका अनुसार, नमस्ते, सिल्क, राखेमालगायत ट्रान्सपोर्ट कम्पनीका ९३ कन्टेनर चिनियाँ क्षेत्र खासा र न्यालममा रोकिएका छन्, जसमध्ये ७० वटा टेलर कन्टेनर दसैं लक्षित सामग्री बोकेका छन्। व्यवसायी कपिल पाख्रिनले भने, “दसैं आउन धेरै समय छैन, उता व्यापारीले हालेको सामान समयमै राजधानी आइनपुग्दा हामीजस्ता दर्जनौं व्यापारी पिरोलिन थालेका छन्।”
न्यालम र अन्य पार्किङ क्षेत्रमा रोकिएका कन्टेनरको दैनिक भाडा झन्डै एक हजार चिनियाँ युआन पर्ने हुँदा व्यवसायीहरू थप आर्थिक भारको सामना गर्न बाध्य भएका छन्। ती कन्टेनरमध्ये २३ वटा फलफूल बोकेका छन्, जसका केही सामग्री पहिले नै कुहिन थालेका छन्। पाख्रिनले थपे, “केही कन्टेनरका सामान त कुहिन थालेका छन्, एउटा चिनियाँ कन्टेनर बराबर तीन नेपाली कन्टेनर सामान हुन्छ भने कतिपय स्याउ बोकेका टेलर लामो भएकाले खासासम्म पनि आउन सकेका छैनन्।”
तातोपानी सुक्खा बन्दरगाह तथा भन्सार कार्यालयका निवर्तमान प्रमुख भन्सार अधिकृत दयानन्द केसीले यो समस्याबारे चिनियाँ जाङ्मु भन्सारलाई अनुरोध गरे पनि तत्काल समाधान नआउने देखिएको छ। चीनले खासालाई ३ वर्षभित्र स्मार्ट सिटी बनाउने लक्ष्यका साथ ५० प्रतिशत पुराना भवन भत्काइसकेको छ र सडक, सुरुङजस्ता संरचनाको निर्माण तीव्र रूपमा अगाडि बढाइरहेको छ। यसका कारण कन्टेनर केही दिन खासा प्रवेश गर्न पाउने छैनन्।
नयाँ प्रमुख कमलकुमार भट्टराईले भने, “चिनियाँ कन्टेनर तातोपानी आउन ढिला भए मूल्य उति महँगो पर्नेछ। पार्किङ भाडा, खाना, खाजा र ढिला हुँदा तिर्नुपर्ने बैंकको ब्याज सबै जोडिँदा उपभोक्तालाई महँगो पर्न जान्छ। दसैं आउने समयमा धेरै सामान आउने र कुरेर बसिरहनुपर्ने बाध्यता व्यवसायीलाई छ।”
सिन्धुपाल्चोक उद्योग वाणिज्य संघका महासचिव ईश्वर गुभाजुले पनि व्यवसायीहरूको समस्या समाधानका लागि प्रयास गरिरहेको बताए। उनले भने, “चिनियाँ भन्सारले सामान पठाउन ढिला गरेकाले कन्टेनर रोकिएको गुनासो उस्तै छ, न्यालम र खासाको बीचमा सुरुङ निर्माण भइरहेकाले कन्टेनर रोकिएका हुन्, यो समस्यालाई सुल्झाउन प्रयासरत छौं।”
यो परिस्थितिमा व्यवसायीहरू चिन्तित छन् कि दसैंको समयमै सामग्री नेपाल आइपुग्ने छैन, जसले गर्दा नेपाली उपभोक्ताले महँगो सामान खरिद गर्नुपर्ने अवस्था आउन सक्छ। नेपालआज
सम्बन्धित खबर
