प्रधान सेनापतिद्वारा इन्डियन मिलिटरी एकेडेमीमा तालिमरत अधिकृत क्याडेटको दलेल कवाज निरीक्षण
एसीपी संवाददाता
२ पुष २०८१, मंगलवार ०९:५५ मा प्रकाशित
मित्रराष्ट्र भारतको औपचारिक भ्रमणमा रहेका प्रधान सेनापति अशोक राज सिग्देल आज (मंसिर २९ गते) भारतको देहरादुनस्थित इन्डियन मिलिटरी एकेडेमीमा तालिमरत अधिकृत क्याडेटहरुको अन्तिम दलेल कवाजमा प्रमुख अतिथिको रूपमा सहभागी भएका छन्।
सो अवसरमा उनले अधिकृत क्याडेटहरूद्वारा प्रदर्शन गरिएको अन्तिम दलेल कवाजको निरीक्षण तथा अवलोकन गरे। कार्यक्रममा उनले नवनियुक्त अधिकृतहरूलाई दर्ज्यानी चिन्ह प्रदान गर्नुका साथै उनीहरूसँग अन्तरक्रिया समेत गरेका थिए।
नेपाली सेनाले विसं २०१० सालदेखि इन्डियन मिलिटरी एकेडेमीमा आफ्ना अधिकृत क्याडेटहरूलाई तालिममा सहभागी गराउँदै आइरहेको छ। हालसम्म उक्त एकेडेमीबाट दुईसय भन्दा बढी नेपाली सेनाका अधिकृत क्याडेटहरू दीक्षित भइसकेका छन्।
बाह्र देशका अधिकृत क्याडेटहरू तालिमरत उक्त एकेडेमीमा हाल नेपाली सेनाबाट ६ जना अधिकृत क्याडेटहरू तालिमरत रहेका छन्।
सम्बन्धित खबर
