नेपाली कांग्रेसद्वारा प्रजातन्त्र दिवसको अवसरमा शुभकामना : सहिदहरूलाई श्रद्धाञ्जली
एसीपी संवाददाता
७ फाल्गुन २०८१, बुधबार १०:०७ मा प्रकाशित
नेपाली कांग्रेसले राष्ट्रिय प्रजातन्त्र दिवसको अवसरमा शुभकामना सन्देश जारी गर्दै लोकतन्त्रको रक्षा र स्थायित्वका लागि प्रतिबद्धता व्यक्त गरेको छ। नेपाली कांग्रेसका सभापति शेरबहादुर देउवाले एक विज्ञप्ति जारी गर्दै फागुन ७ लाई नेपालको जनसंघर्षको ऐतिहासिक दिन भन्दै सम्पूर्ण नेपालीलाई बधाई तथा शुभकामना दिएका छन्।
विज्ञप्तिमा भनिएको छ कि वि.सं. २००७ मा नेपाली कांग्रेसको नेतृत्वमा भएको क्रान्तिले निरंकुश राणा शासनको अन्त्य गरी नेपालमा प्रजातन्त्रको स्थापना गरेको थियो। यो क्रान्तिले केवल राजनीतिक परिवर्तन मात्र गरेन, सामाजिक, आर्थिक, शैक्षिक, धार्मिक तथा अन्य क्षेत्रमा आमूल परिवर्तन ल्याएको उल्लेख गरिएको छ। नेपाली समाजलाई जाति, धर्म, लिंग तथा वर्गीय आधारबाट माथि उठाउँदै समावेशी र न्यायसंगत समाज निर्माण गर्ने दिशामा अग्रसर गराएको कांग्रेसको भनाइ छ।
सभापति देउवाले राष्ट्रिय स्वाधीनता, नागरिक अधिकार, लोकतन्त्रको सुदृढीकरण र समावेशी शासन प्रणालीका लागि नेपाली कांग्रेस सधैं प्रतिबद्ध रहने उल्लेख गर्दै हाल देशमा देखिएका राजनीतिक अस्थिरता र लोकतन्त्रप्रति बढ्दो निराशाको सन्दर्भमा लोकतान्त्रिक मूल्य र संस्थाहरूको रक्षा गर्न सबै नागरिक सचेत हुनुपर्ने आह्वान गरेका छन्।
उनले नेपालका संविधानिक संरचनाहरूलाई थप सुदृढ गर्न, लोकतन्त्रको जगेर्ना गर्न, सुशासन कायम गर्न तथा आर्थिक समृद्धि हासिल गर्न सबै नागरिकको सहभागिता अपरिहार्य रहेको बताए। साथै, प्रजातन्त्र स्थापनाका लागि संघर्ष गर्ने महान व्यक्तित्वहरूको योगदानप्रति सम्मान व्यक्त गर्दै नेपाली कांग्रेसले प्रजातान्त्रिक मूल्य मान्यताको संरक्षणमा कुनै सम्झौता नगर्ने प्रतिबद्धता व्यक्त गरेको छ।
शुभकामना सन्देशमा लोकतन्त्रको रक्षा, सुशासन र नागरिक अधिकार सुनिश्चित गर्न नेपाली कांग्रेस अगाडि बढ्ने उल्लेख गरिएको छ।
सम्बन्धित खबर
