कतारमा ५५ संघसंस्थाको संयुक्त आयोजनामा शुभकामना आदानप्रदान तथा इफ्तार कार्यक्रम सम्पन्न
एसीपी संवाददाता
२७ फाल्गुन २०८१, मंगलवार १८:१७ मा प्रकाशित
दोहा, कतार – मुस्लिम धर्मावलम्बीहरूको पवित्र महिना रमदानको अवसरमा कतारमा स्थापित ५५ संघसंस्थाको संयुक्त आयोजनामा इफ्तार कार्यक्रम सम्पन्न भएको छ। दोहाको फूलबारी रेस्टुरेन्टको हलमा आयोजित यस कार्यक्रमको संयोजन नेपाल–कतार समुदाय (NCC) सहित विभिन्न संघसंस्थाले गरेका थिए।
कार्यक्रममा नेपाली समुदायका अगुवाहरू, संघसंस्थाका प्रतिनिधिहरू तथा विभिन्न पेशामा आबद्ध व्यक्तिहरूको उल्लेखनीय उपस्थिति रहेको थियो। इफ्तार कार्यक्रमसँगै शुभकामना आदानप्रदानसमेत गरिएको थियो, जसमा वक्ताहरूले रमदानको धार्मिक, सामाजिक तथा आध्यात्मिक महत्वबारे प्रकाश पारे।
संयोजकहरूले नेपाली समुदायबीच आपसी सद्भाव र भाइचारालाई प्रवर्द्धन गर्न यस्ता कार्यक्रमहरू आवश्यक रहेको बताएका छन्। सहभागीहरूले रमदान महिनाले संयम, सहिष्णुता, दानशीलता र मानव सेवाको सन्देश दिने हुँदा यसका मूल्य–मान्यताहरूलाई आत्मसात गर्नुपर्ने कुरामा जोड दिएका थिए।
कार्यक्रमको अन्त्यमा आयोजकहरूले सम्पूर्ण सहभागीप्रति आभार व्यक्त गर्दै आगामी दिनहरूमा पनि यस्ता कार्यक्रम निरन्तर सञ्चालन गरिने प्रतिबद्धता जनाए।
सम्बन्धित खबर
