महेन्द्र युवा सूचना केन्द्रलाई सिकाइ तथा प्रविधि सामग्री हस्तान्तरण
एसीपी संवाददाता
१४ आश्विन २०८३, बुधबार १९:०७ मा प्रकाशित
नेपालगन्ज, बाँके — सेभ द चिल्ड्रेन (Save the Children) को साझेदारी तथा सामाजिक विकास मञ्च (SDF), बाँकेद्वारा सञ्चालित UPLIFT परियोजना अन्तर्गत नेपालगन्ज उपमहानगरपालिका वडा नं. ८ स्थित महेन्द्र युवा सूचना केन्द्रलाई सिकाइ तथा प्रविधि सामग्री हस्तान्तरण गरिएको छ।
युवाहरूमा डिजिटल साक्षरता अभिवृद्धि गर्न, सूचना तथा प्रविधिमा सहज पहुँच पुर्याउन र सिकाइ प्रक्रियालाई अझ प्रभावकारी एवं गुणस्तरीय बनाउने उद्देश्यले उक्त सामग्रीहरू उपलब्ध गराइएको हो।
सामग्री हस्तान्तरण कार्यक्रम नेपालगन्ज उपमहानगरपालिका वडा नं. ८ का वडा अध्यक्ष रजनीश वाजपेयी, वडा सदस्यहरू अमन गुप्ता र निखिल वैश्य, तथा सामाजिक विकास मञ्चका वरिष्ठ सल्लाहकार घनश्याम उपाध्यायको विशेष उपस्थितिमा सम्पन्न भएको थियो।
कार्यक्रममा UPLIFT परियोजनाका संयोजक राम श्रेष्ठ, कार्यक्रम अधिकृत बृजेश नाउ (ठाकुर), फिल्ड अधिकृत सुबनी क्षेत्री र महेन्द्र युवा सूचना केन्द्रकी प्राविधिक मनिषा नाउ (ठाकुर) लगायतका प्रतिनिधिहरूको सहभागिता रहेको थियो।
सो अवसरमा बोल्दै UPLIFT परियोजनाका कार्यक्रम अधिकृत बृजेश नाउ (ठाकुर) ले भन्नुभयो, “आजको प्रविधिको युगमा युवाहरूलाई डिजिटल सीप र सूचनामा पहुँच पुर्याउनु अत्यन्तै आवश्यक छ। हस्तान्तरण गरिएका यी सामग्रीहरूले महेन्द्र युवा सूचना केन्द्रमार्फत स्थानीय युवाहरूलाई कम्प्युटर शिक्षा तथा आधुनिक सिकाइ प्रक्रियासँग जोड्न र उनीहरूको क्षमता विकासमा महत्त्वपूर्ण योगदान पुर्याउनेछ।”
हस्तान्तरण गरिएका सामग्रीहरूले सूचना केन्द्रको दैनिक पठनपाठन तथा कम्प्युटर सिकाइ सञ्चालनमा थप टेवा पुग्ने र स्थानीय युवाहरूलाई सूचना र प्रविधिसँग जोड्न महत्त्वपूर्ण भूमिका खेल्ने विश्वास व्यक्त गरिएको छ।
सम्बन्धित खबर
