नेपाल-भारत सिमानाका बन्द हुने
एसीपी संवाददाता
५ बैशाख २०७८, आईतवार ०२:३७ मा प्रकाशित
कैलाली / भारतको उत्तर प्रदेशमा हुने निर्वाचनका लागि नेपाल-भारत सीमा ३२ घण्टा सिल हुने भएको छ । त्यहाँ हुने पञ्चायत चुनावको लागि आइतबार बेलुका ४ बजेदेखि सोमबारराति १२ बजेसम्म नाका सिल हुने प्रशासनले जनाएको छ ।
कैलाली र कञ्चनपुर दुवै जिल्लाका प्रशासन कार्यालयले यसबीच गौरीफन्टा नाका पूर्णरूपले बन्द रहने जनाएका छन् । कञ्चनपुरका सहायक प्रमुख जिल्ला अधिकारी अशोक कुमार भण्डारीले भारतमा हुने चुनावका बेला बोर्डर सिल गर्ने विषयमा सहमति भएको बताउनुभयो ।
कैलाली जिल्ला प्रशासन कार्यालयका सूचना अधिकारी शिवराज जोशीले १८ अप्रिल बेलुका ४ बजेदेखि १९ अप्रिल राति १२ बजेसम्म सीमा सिल हुने बताउनुभयो । उहाँले त्यस रात नाका नखुल्ने र अर्को दिन बिहानमात्र सुचारू हुने बताउनुभयो ।
नेपाल-भारत सीमामा उत्तर प्रदेशका सात जिल्ला महाराजगंज, सिद्धार्थनगर, श्रावस्ती, बलरामपुर, बहराइच, लखीमपुर खीरी र पीलीभीत पर्दछन् । उत्तर प्रदेश र नेपालसँग ५५१ किलोमिटर लामो सीमा छ ।
चुनावलाई मध्यनजर गर्दै सीमामा अतिरिक्त सतर्कता अपनाइएको भारतीय सञ्चार माध्यमले जनाएका छन् । नेपाल र भारत दुबै देशमा चुनावका बेला सुरक्षाका दृष्टिकोणले सीमामा आवागमन रोक्ने गरिएको छ ।
सम्बन्धित खबर
महासमय स्थलमा थाइल्याण्डका भिक्षुद्वारा पूजापा
२४ घण्टा अगाडि
