अन्सारी नेपाली पत्रकारिता क्षेत्रमा एक प्रेरणादायी नाम हो
नेपाल प्रेस इन्स्टिच्यूट, क्षेत्रीय सञ्चार स्रोत केन्द्र नेपालगञ्जका प्रमुख तथा वरिष्ठ पत्रकार मोहम्मद आरिफ अन्सारी नेपाली पत्रकारिता क्षेत्रमा एक प्रेरणादायी नाम हुन्। सत्य, तथ्य र निष्पक्ष पत्रकारिताप्रति अटल रहँदै उनले कलमलाई समाजपरिवर्तनको साधन बनाएका छन्। मात्र पत्रकारितामा सक्रिय नभई नयाँ पुस्ताका पत्रकारहरूलाई मार्गदर्शन गर्ने गुरुका रूपमा समेत उनको भूमिका प्रशंसनीय देखिन्छ।
सामाजिक न्याय, समानता र आमजनताको आवाजलाई प्रष्ट रूपमा अभिव्यक्त गर्न अन्सारीज्यूले पुर्याएको योगदान विशेष महत्वका साथ स्मरणीय छ। उनको कार्यशैलीमा सरलता, विचारमा गहिराइ, र पत्रकारिताप्रतिको निष्ठा स्पष्ट झल्किन्छ। नेपाल प्रेस इन्स्टिच्यूटलाई सुदृढ बनाउन उनले दिएको नेतृत्व तथा पत्रकारितालाई व्यावसायिक, उत्तरदायी र सशक्त बनाउन गरेको पहल उल्लेखनीय छ।
उनको कर्मठता, इमानदारी र योगदानले भावी पुस्ताका पत्रकारहरू मात्र नभई सम्पूर्ण सञ्चार जगतलाई प्रेरित गरेको छ। साथै, उनी नेपाल पत्रकार महासंघका प्रदेश कार्यसमितिका सक्रिय सदस्यका रूपमा पनि जिम्मेवारीपूर्वक क्रियाशील रहँदै आएका छन्।
Via_ रातो कलम


